Shillong, Rymphang 10: U Dr Kamlesh Kumar Pandey Chief Commissioner ba dei peit ia ki ba don jingduna ha ki dkhot met u la ong ba ha dien ba la dep ban ia kynduh bad ki heh sorkar jong ka jylla Meghalaya bad kum juh ia ki seng bhalang u la ong ba u la ioh ia ka jingtip ba ha kane ka jylla Meghalaya la thung kam tang 59 ngut ki briew kiba don ia ka jingduna ha ki dkhot met hapoh jong ka ain Person with Disabilities (PWD) Act.
Haba kren ha ki nongthoh khubor ha dien ba u la dep ban ia kren bad ki heh jong ka sorkar jylla la shem ba ki don haduh 800 ngut ki briew kiba dei hok ban ioh kam hapoh jong ka PwDs Act, hynrei kaba sngewsih ka long ba ka sorkar jylla ka dang thung tang 59 ngut ki briew na ka bhah kam kaba 3% ka bhah kaba la mang ia ki.
U Chief Commissioner u Dr Pandey, u la ong ba yn s alum thup ia kane ka jingiakren baroh bad un sa ai ha u Chief Secretary jong ka jylla na ka bynta ban pyntrei kam ia ki skhim kiba dei na ka bynta jong ki ha kane ka jylla Meghalaya.
Ha ka juh ka por u Chief Commissioner u la ai ka jingiaroh ia ka sorkar jylla kaba la thung ia ka Commissioner ba pura jong ka jylla hynrei ha ka juh ka por u la pynpaw ia ka jingsngewshih ba ia ki nongtrei pat la thung kum ki nongtrei shipor.
Haba kren halor ka ain kaba thymmai ha kaba ia dei bad ki briew kiba don jingduna ha ki dkhot met u la ong ba ka Right to Persons With Disabilities Act, 2016, kala pynkubor ia ki Commissioner ban pynshitom ia kino kino kiba pynthud ia ki briew kiba don ia ka jingduna ha ki dkhot met. Ka sorkar ka dei ban buh ia ki nongbishar ha baroh ki District ban bishar kyrpang ia ki mukotduma kiba ia dei bad ki.
Hapoh kane ka ain kaba thymmai ia kaba yn sa pyntrei kam pura naduh u bnai Iaiong mynta u snem , ia ka bhah thung kam na ka bynta jong ki la kyntiew sha ka 4% na ka 3% kaba mynshuwa. Katkum ka khana samari ha kane ka jylla Meghalaya jong u snem 2011 ki briew kiba don ia ka jingduna ha ki dkhot met ki long haduh 44317 ngut bad na kine kiba la ioh ia ka certificate ki long 35515 ngut . Ia ki rukom jingduna ha ki dkhot met la pynkiew sha ka 21 jait na ka 7 jaid kaba don mynshuwa.
