Shillong, Risaw 05: Ka cabinet jong ka sorkar pdeng mynta ka sngi hapoh kala pdiang ban wan rah ia ka jingkylla ha kaba ia dei bad ka HIV and AIDS (Prevention and Control) Bill, 2014. La wanrah ia kane ka bill kalong ban ai ka jingiada ia ki briew kiba don ia kane ka jingpang.
Ka jingthmu jong kane ka Bill ka long ban iada ia ki briew kiba don ia kane ka jingpang na ka jingshah kyntait ha ka imlang sah lang, da kane ka bill kiba don ia kane ka jingkin dup ioh ia ki lad jingsumar bad ba kan don ka jaka ba ki lah ban ai ka jingujor lada ka don kano kano ka jingshah niew bein.
Ha kaneka bill la kdew ia ka hok jong kine ki ba don ia kane ka jingpang ha kaba ia dei bad ka imlang sah lang, ha kaba ki lah ban beteng ia ka jingpule jong ki, ki lah ban don la ka jong ka akow ha ki bank, kin pyniaid ia ki jingdon jingem jong ki bad kaba kongsan ka long ba kin ioh ia ka jingsumar kumba ioh lem kiwei.
Katkum kane ka bill la khang pyrshah iano iano ban iathuh ba ki don ia kane ka jingpang lait noh tang ba pan jingtip ka iing bishar bad ka dei ka bynta jong ka sorkar pdeng bad jong ka sorkar jylla ba kin wad ki lad ki lynti kumno ban khanglad ia ka jingsaphriang kane ka jingpang.
Ha kaba ia dei bad ki lad jingiarap kiba ka sorkar ka don kine ki briew ruh ki dei ban ioh kumba ioh lang kiwei kam dei ban don ka jingshah niew shiliang khmat bad lada don kiba pynkhein ia kane ka ain dei ban pynshitom ia kum kita ki briew.
Ha kine ki shiphew snem kiba la leit noh kane ka jingpang kala hiar shibun ha Ri India hynrei dang don kami a kane ka bill namar ba iada ia kiba don ia kane ka jingpang bad katkum ka jingkhein kiba don ia kane ka jingpang ha ka Ri India baroh kawei ki dang don kumba 21 lak ngut bad ka sorkar ka kwah ban pynkut ia kane ka jingpang ha kane ka Ri da kaba buh ia kthong ba ha u snem 2030 ka Ri India ka dei ban lait na kane ka jingpang.
