Shillong, Rymphang 10: Shuwa ka election MDC shiteng samoi, u president jong ka UDP u Dr Donkupar Roy haba kren ha ki lad pathai khubor ha jaka sah jong u u la ong “ Jied ia ka UDP ban pynskhem ia ka shuki CEM jong u Bah PN Syiem ha KHADC”.
Ka UDP ka dei kawei na ki kynhun hapoh jong ka Executive Committee ha ka lama jong ka People Democratic Front (PDF) kaba la ialam da u Bah PN Syiem kum u Chief Executive Member, ha kaba ka UDP kala phah ia ki jingpan jingpynshai haduh khyndai tylli ki mat.
U Bah T Chyne president jong ka UDP East Khasi Hills District u la ong ba na ka liang jong u CEM u Bah PN Syiem u la dep jubab da ka shithi sha u nongialam jong ka Parliamentary Party jong ka UDP ha KHADC u Bah Teinwll Dkhar bad ia kane kin sa ia kren ha ka PDF ka ban long ha ka 16 tarik mynta u bnai.
Ha dien jong kane ka jingiakren hapoh ka PDF ki MDC jong ka UDP kin rah ia kaei kaba ki ia rai hapoh jong ka PDF sha ka party bad ka party kan sa shong bad kin sa ia kren ia kaei kaba mih na ka jingialang jong ka PDF.
