Shillong, Jylliew 24: Ka kynhun ki nongkhaii na Bangladesh mynta ka sngi kila wan sha Shillong ban ia kynduh ia u myntri rangbah ka jylla u Dr Mukul Sangma ban ia kren kumno ban pynkhlain ia ka khaii pateng na kane ka jylla sha Bangladesh.
Haba kren ha ki lad pathai khubor u myntri rangbah ka jylla ha dien ba la wai ka jingialang kaba la long ha Pine Wood Hotel Shillong mynta ka sngi u la ong ba ka jingiakren ka long halor ki saw tylli ki mat, ki kam bor ding, Marpoh khyndew, ki kam jngohkai pyrthei bad ka koit ka khhiah.
U myntri rangbah la ong ba ka Ri Bangladesh ha ki bynta ba shatei ka don ka jingduna bor ding bad lada ka long kaba lah ba ka Bangladesh ka lah ban thied ia ka bor ding eletrik na Meghalaya lyngba ka Sohra bad ka bynta ba sha sep ngi jong ka jylla lyngba ka 132 KV line bad lada don kam lah ban pynheh ruh sha ka 300 KV lane 400 KV.
U myntri rangbah u la ong ba kumba ka long mynta ka jylla ka die bor ding electric namar 24X7 ka jingdon kam ia ka bor ding kam long ka juh, ka don ka por ba ka bor dong don dei ha kum kane ka por lah ban die ia ka bor ding. Kumba ka long mynta ka don ka jaka pynmih bor ding na ka jylla Arunachal Pradesh kala jan pyntrei kam ha kaba ka jylla Meghalaya ruh kan sa ioh ia ka bha. Ha ka juh ka por lah ban pyndon kam ruh ia ka jylla kum ka jaka iaid lynti ban shallan bor ding sha Bangladesh.
Haba ia dei bad ka jingtih ia ki marpoh khyndew u myntri rangbah u la iathuh ba ka sorkar ka la dep ban thung ia ka Meghalaya Minerals Development Corporation (MMDC) ba kan long ka agency jong ka sorkar ba kan ia treilang bad ki trai par, ha kaba ki trai par kin ia soi ia ka jingiathekular bad ka MMDC bad ka MMDC kan shim ia ka jingkit khlieh ban pynioh ia ki jingbit baroh kynthup ia ka jingtih ia u mar poh khyndew.
Haba ka MMDC kan leh ia kane ka kam ban tih ia u marpoh khyndew ka hap ban thung ia ki ‘mine developer’ ha ka rukom kaba dei bad kine ki mine development kin leh ia ki kam baroh ha duh ban ba ioh jingbit ban tih bad ba kin pynbiang ia ki kot ki sla katkum ka jing don kam jong ki ain baroh bad ia ki hap ban siew kumba siew lem ia ki kontrator.
Dei hangne ba don kam ia ki briew kiba tip bad kiba tbit kiba don ia ki jingtip baroh ha kaba ia dei bad ka kam tih mar poh khyndew bad kum kine ki briew kiba la lah ban leh ki la don. Ha kane ka jingiakynduh la ia kren ruh kumno ban kyntiew ia ki kam shang kai pyrthei bad kum juh ha ka liang ka koit ka khiah namar bun ki briew na Bangladesh ki phah sumar sha bar lada ki wan sha kane ka jylla kan kham jan ia ki.
