Shillong, Jymmang 
26: Mynta ka sngi ka Bansara Eye Care ha ryngkat ka jingiatreilang bad ka St Edmund’s College, Social Work Department , MSW ki la pynbna ia ka shnong Mawkasain, East Khasi Hills kaba don sharum ka shnong Mawsynram kum ka shnong kaba lait bad kiar na ki jingpang kiba la lah ban ialam sha ka jing-matlah.
Ha ka jingialang ba la pynlong ha ka Seng Khasi Hall Mawsynram, la wan ban ia donlang ruh da u Chief Executive Member ka Khasi Hills Autonomous District Council u Bah Pynshngain N Syiem u ba dei ruh u MLA ka Mawsynram Constituency, u Dr B Diengdoh na ka Mawsynram Community Health Centre, ka Dr J Basaiawmoit kaba dei ka Managing Director jong ka Bansara Eye Care, u Chief Executive Officer ka Bansara Eye Care u Bah A Basaiawmoit, u Rangbah Shnong ka Shnong Mawkasain u Bah B Dewsaw.
u Professor ka St Edmund’s College na ka tnad Social Work u Bah Randolph Langstieh, ki longkmie ki rangbah kynthup kiba la ioh jingiarap na ka Bansara Eye care, ki samla pule MSW ka St Edmund’s College kiba la shim ban wad bniah halor ki jingpang kiba lah ban lam sha ka jing-matlah ha baroh shi snem lynter ha kane ka shnong hapoh ka jingialam u samla Juster Lyngdoh, ki khynnah skul lem bad kiwei kiwei.
Ha kane ka jingialang shwa ban plie ia ka Sign Borad sah kynmaw halor kane ka jingpynbna ia kane ka shnong kum ka shnong kaba lait na ki jingpang kiba lah ban ialam sha ka jingmat lah, la ioh ia ka jingkren na kiba la ia don lang kiba la pynpaw ka jingiaroh ia ka Bansara Eye Care bad kumjuh ruh ia ki samla pule ka St Edmund’s kiba la pynlong ia ka jingiatreilang kum shi bynta ban rat dyngkhong ia ki jingpang kiba lah ban pynduh noh ia ka bor iohi.
Haba kren kum u Kongsan, u Bah Pynshngain N syiem u la ong ba ka long ka burom kaba khraw ia ka shnong kaba tang shisnem hadien ka jingioh syrnod kum ka shnong kaba lait na ka jingleit painkhana pathar mynta ka kynti pat ka la ioh sa ia kane ka nam kum ka shnong kaba lait na ki jingpang kiba lah ban pyn-matlah. ” Kum u Nongmih khmat nga ai ka jingsngew burom ia ki bor pyniaid ka Bansara Eye Care kiba la pynlong ia kane ka jingthmu ban rat ia ki jingpang kiba ktah ia ka bor iohi”, la ong u Bah Pynshngain.
Ka long ruh ka jingsngew burom ha kaba na ka liang ka Shnong Mawkasain ka ai jingiatrei lang ban pynlong ia kane ka jingthmu ba bha kaba jop”, u la ong shuh shuh bad u pynpaw ruh ba kam long ka kam kaba suk ban pynlong ia ka jingwad bniah ne ban ialam ia kiba don jingshitom khmat sha Shillong bad phah sumar ia ki. Ha kane ka sngi la sam ruh ia ki jingai sngewbha sha ki samla kiba la pynlong ia ka jingwad bniah kynthup ia u samla Juster Lyngdoh, ka samla D Rapthap, ka samla M Thangkhiew bad ka samla A Momin kiba dei na ka tnad MSW bad kumjuh ia ki samla kiba la iarap ia ki na kane ka shnong kumjuh ia kiba la ia donlang ha kane ka sngi kynthup ia u Rangbah Shnong.
