Shillong, Rymphang 11: U Samla Lambokstarwell Marngar ha ka jingkren ba nyngkong ka jong u kum u president ba thymmai jong ka seng samla pule Khasi Student’s Union (KSU) mynta ka sngi u la ong ba, ki jingeh, ki jingkynthoh, ki jingpyntryrha kin wan, hynrei ka thong ka long ban ia iada ia ka jaidbynriew.
Ha ka jingkren shimti ia ka kam kum u nongialam ba thymmai jong ka seng KSU, u la ong ba nangne sha khmat ym lah ban tip kaei kaban jia, hynrei dang lah ban shah khot kum ki riew beain ban ia kaba duh ia ka khyndew ka shyiap.
U samla Lambokstarwell, president ba thymmai jong ka seng KSU, u la ai khublei kyrpang ia ki para dkhot kiba la ia poi naduh Mizoram, Silchar bad Halflong bad ia baroh ki unit jong ka seng kiba la wan ban ia shim bynta ha kane ka sngi ban jied ia ki nongkit kam kiba thymmai jong ka seng. U la ai khublei kyrpang ruh ia ki nongialam jong ka seng kiba la shongthait.
Ia ka rislot jong kane ka elekshon kaba khatlai jong ka seng KSU la pynbna da u Chairman jogn ka Election Committee u Bah Danny Khyriem, ha kaba u la pynbna ba u Bah Lambostarwell Marngar u la shah jied khlem da don ba ialeh pyrshah kum u president jong ka seng KSU na ka bynta kane ka samoi trei kam 2017-2020.
Ka kam Vice President ruh la jied khlem da don ba ialeh pyrshah bad u Bah Shemphang Lyngdoh Mawphlang u la long u vice president ba thymmai jong ka seng bad u Bah Donal V Thabah u la shah jied kum u General Secretary jong ka seng khlem da don ba ia leh pyrshah.
Ha ki kam ba la hap ban pynlong da ka jingiathep vote ki long ka kam Assistant General Secretary, kiba ia khun ki long ar ngut ha kaba u samla Sonstar Nongkhlaw u la jop da kaba ioh 2085 vote, ha ka kam Organizing Secretary kila don ar ngut kiba ia khun ia kane ka kam, hynrei u samla Biangbor Paliar u la jop ia kane ka kam da kaba u la ioh 2557 vote.
Na ka bynta ka kam Education Secretary kiba la ia khun ia ka election ki don lai ngut, ha kaba u samla Readyonstone Nongrum u la jop da kaba ioh 1414 vote, na ka bynta ka kam Publicity Secretary kiba ia khun ia ka election ki don lain gut , ha kaba u samla Rapbor Nongrum u la jop da kaba ioh 1887 vote. Ia ka kam office Secretary la jop da u samla Spaindorsing Lyngdkhoi ha kaba u la ioh 1050 vote, ia kane ka kam kiba la ia khun ki don hynriew ngut.
Ha ka jingpynbna jong u Chairman jong ka Election Committee jong ka seng KSU, u Bah Danny Khyriem u la ong ba ki shnat jong ka seng baroh ki don 354 tylli bad la shah tang shiphew ngut na kawei ka unit ban long ki nongthep vote bad baroh ki nongthep vote ban jied ia ki nongkit kam jong ka seng KSU ha kane ka election kaba mynta ki don 3199 ngut.
Ki nongpeit pyrman kiba la wan ha kane ka sngi ban peit ba ka election kan long kaba iaid beit iaid ryntih ki long u Bah Robert G Lyngdoh myntri kam poh iing ba rim jong ka jylla, u Bah Sumarsing Sawian u rangbah ba la ieh bha ha ki kam thoh khubor, u Bah Sadon Blah president ka HNYF bad u Bah Willbert Rani president ka FKJGP.
