Shillong, Iaiong 04: Ka Seng Ka KHASI YOUTH RURAL SOCIAL & INTEGRATED OF ECONOMIC WELFARE (KYRSIEW) Mawsynram Area hakaba iadei bad ka jingmih khubor halor ka jingkam ka Shnong Mawsynram ba ka jingdawa jongka Seng FKJGP ban weng ia u doctor napoh Mawsynram CHC ka long ka bymdon nongrim bad ka Seng ka ong mynta ba ka long kaei kaei kaba kimlah ban pdiang da lei lei ruh em.Ka seng lyngba kane ka kyrwoh ka pynrem jur iaki nongkitkam shnong Mawsynram kiba lakam ba ki ieng naka bynta u Paitbah hakaba iadei bad ka jingleh jongka FKJGP.
Ka Seng ka kwah ban buh iaka jingkylli mynta shaki nongkitkam shnong jongka Mawsynram ba shano ki jah baroh shikatta balei ki iohthiah lyngngai haba ki jia kiei kiei hapoh ka Shnong bad ka thain baroh kawei, ym tang katta kim ju kham iohi ne ioh sngew ei ei ruh em ba na kaliang ka Shnong Mawsynram kan tuklar.
Ka KYRSIEW ka ngeit skhem ba wat naka liang ki nongkitkam jongka Shnong Mawsynram kila tip pynlein ia katei ka kam naduh ki por kiba mynshuwa balei pat kim tuklar halor katei ka jingjia bad mynta pat ynda la khihwin ki sengbhalang sa ong pat ba ka bymdei.
Ka Seng ka kyntu ia kiwei pat ki nongkitkam Shnong jong ka Shnong Mawsynram kumjuh ruh ia ki Paitbah nong shong shnong bad khamtam eh iaki paitbah jong ka thain baroh kawei ba kim dei ban shah ialam bakla da lei lei ruh em halor ka jingleh jong ki katto katne ngut kiba pynthoh bria iaka shnong baroh kawei.
Ka seng ka ong ba kane baroh kadei tang ka jing iashah shiliang jongki katto katne ki nongkitkam shnong ia utei u doctor ym baroh bad ki pynlong langknia pat ia u paitbah bapli u babun u bymtip eiei ruh em.ki ruh kum ka seng kaba trei mon sngewbha hapoh ka thain lila ioh pdiang shibun ki jingujor pyrshah ia utei u doctor ha kaba iadei bad ka jingleh jong u hynrei ki tip shai ba na kaliang ka Seng FKJGP kala iaid sha khmat iaka kam hynrei ki ai pat iaka jingiatreilang.
Shano ka shnong Mawsynram ka jah haki por ba khih win u khaw rashon bad shano ka shnong Mawsynram kajah haki por bymdon doctor ka CHC bad shano ka shnong mawsynram ka jah ha kapor ba ki dkhar ki wanleh puja hapoh ka krem Mawjymbuin bad bun bah kiwei kiwei kiba la dep jia kiba ki iohi tyngkrein kum ki briew kiba nabar shnong, ka Shnong haka jingshisha kala dei ban tuklar hynrei ka sngap jar jar.
Ka Seng ka pynpaw ruh ba kum ki nongkitkam shnong ymdei ban shu tynrah matlah khlem da pyrkhat bad khlem da tip ia ki jingshisha kum ki riewrangbah dei ban da pyrkhat sani bha ha shuwa ban shim ia kano kano ka rai namar ioh ba ka ktah ia u ba bun ba lang. Ka jingshimrai jongka Seng FKJGP kadei ka rai rangbah bad kadei namar kum ka seng ki ngeit skhem ba ka iohi iaka jingeh jongki paitbah haka thain baroh kawei. Ka Mawsynram CHC kamdei tang ia u nong shong shnong hapoh Mawsynram hynrei kadei naka bynta ia baroh ki shnong kiba hap hapoh ka Block baroh kawei don bun ki shnong kiba katei ka CHC ka peit ym tang iaka Mawsynram.
Hato ki nongkitkam shnong jong ka Mawsynram ki sngewthuh lem mo iaka jingeh jongngi u paitbah jongka thain ne ioh ki shu kam trai jait ba kadon hapoh u pud u sam jongka lada kalong kumta ka Sorkar kaladei ban buh noh iaki CHC ha manla ki shnong.
Mano ba pynbor iaka sorkar ban wanrah doctor ha katei ka CHC ha kapor bymdon doctor dei ki nongkitkam ka Shnong Mawsynram ne ka Seng FKJGP,hato ki nongkitkam jongka Mawsynram ki iohi ne em.
Nakaliang ka seng ka ai ka jingkyrshan kaba pura iaka Seng FKJGP Mawsynram Circle namar haka thain hi baroh kawei dei tang kane ka Seng kaba khlainbor bad treikam bha,ym dei tangban shu rah skong iaka FKJGP hynrei ngida iohi ruh iaki matti treikam jongka,dei tang u Paitbah u ba iakynduh iaki kam uta uba sngewthuh.Ka FKJGP Mawsynram Circle kamdei tang iaka Shnong Mawsynram kadei naka bynta jongngi ki shnong ki dong ba marjan jongka baroh kawei.
Ban shim iaka rai ban pynduh pyndam iaka Seng hakatei ka jaka hap ban pyrkhat arsien ne ioh lada nakaliang ki Nongkitkam jongka Shnong kilah ban iarap lem iaka jingeh. Kumta ngi kyntu iaka Shnong Mawsynram ba wat kren kulmar.
Ka Seng ka ai mynsiem ia ki Nongkitkam jongka FKJGP ba kim dei ban kynran dien noh halor kane ka kam.Lada ka Shnong Mawsynram ka ai NOC ia ki doctor ban buh iaka Private clinic hapoh ka CHC te kan dang myntoi aiu shuh iaka sorkar ba kan khih kan ksar ban pynbiang iaki jingduna hapoh ka CHC namar ki tip shai ba katei ka CHC kadei ban treikam beit baroh 24 kynta.
Kum ka shnong ka dei ban peitlem ia u rangli u juki, u kup shiliang u sem shiliang u bymlah kotbor ban phah sumar private shaei un leit.Ka Shnong haka jingshisha lada ka iohi jngai kala dei ban kyntu iaka sorkar ba kadei ban pynbiang iakatei ka CHC ym pat ban shah ban buh private namar ka jingbuh private jong ki doctor hapoh Mawsynram CHC ka ktah shibun iaki Paitbah ki ba wan shim dawai lyngba ka CHC lada jia ba kidon kiba kwah shim private na u bad don ruh ki ba wan shim lyngba ka CHC hakajuh kapor un leh kumno u Doctor un hap hi ban ieh shiliang.
Ka Seng ka kyntu iaka Sorkar ba kadei ban shi khia iakatei ka jingai NOC jongka Shnong Mawsynram iaki doctor ban buh Private Clinic bad Pharmacy hapoh phyllaw ka CHC lada dei ban ai NOC dei ban ai shabar ka CHC sha iew sha hat ym ha phyllaw.
Hakaba pynkut iaka kyrwoh ka Seng ka pynpaw iaka jingsngewsih ban iohi kum kitei ki jingjia kindon,wat la katta ruh nakaliang ka seng ka pynpaw ruh iaka jingbitar shla bad pynrem jur halor ka jingleh biet jongkitei ki nongkitkam shnong bad kiwei kiwei khlem da pyrkhat sani shuh ha kiliang baroh.(SP News)
