Shillong, Jymmang 30: Ka KHNAM ka pynrem jur ia ka jingleh kyllut jong ka sorkar MUA-II halor ka issue lynti rel. Ka jingdawa ban wanrah ia ki lad ki lynti ki ba biang ban khanglad ia ka jingrung kyrthep jong u mynder ka dei ka mat jingdawa jong u ba bun balang ha shwa ban pyntrei ia ka lynti rel. Hynrei la iohi ba ka sorkar jylla kam don jingkit khlieh ia ka bha ka miat jong u trai ri trai muluk.
Ka jingkren jong u Myntri khynnah jong ka sorkar pdeng u R Gohain ha ki bnai ba la dep, ba ka jingwan jong ka lynti rel kam ktah ia ka jingrung kyrthep jong u mynder ka long tang ki jingkren pynbiet. Kum u trai jylla ngi don hok ban pyrkhat iala ka jong ka jing longtrai, bad kum ki rit paid ngi don ruh ka hok ban iada ia lade na ka jingshah thombor ban bor.
Ka sorkar jylla ka la shim sting ia ka mat kaba iadei bad ka jingwanrung kyrthep ki briew ban a bar, bad kane ka la pynduh jingkyrmen ia u paidbah. Ka seng ka sngewdei ban pyrshah ia kano kano ka development kaba ia peing pat ia ka hok ka jong ngi u trai ri trai muluk.
Balei sngew kyrkieh ban develop ia ka lynti rel, balei ka sorkar pdeng bad ka sorkar jylla kam pyrkhat shwa ban develop ia ki skul, ki college, ki university ki ba bha ha man la ki district, ki lad ai jingsumar ba bha tam ha man la ki district, ki development halor ka rep ka riang, ka development halor ioh kam ioh jam ki samla, ka development ia ki surok khamtam sha nongkyndon bad kiwei kwei ki development ki ban wanrah jingmyntoi ia u trai ri trai muluk.
Kane lehse kadei ka jingpyrshan jong ka sorkar pdeng bad ka sorkar MUA-II ban kit noh da ka rel ia ki mynder ym shuh da ki bus bad ki kali. Ka jingbym don jingkit khlieh jong ka sorkar jylla ka la ktah ia ka shongsuk shongsain ha Ri-Bhoi District ka ban rakhie ia ka silver jubilee jong ka mynta u snem bad ruh ha ka jylla baroh kawei.
Kane ka sorkar kam dei jong u paidbah hynrei ka iohi ba kadei ka sorkar tang jong ki katto katne ki riew shynshar donbor. Khnang ba kan ym don kano kano ka thut ha ka shong suk shong sain, ka seng ka daw ba ka sorkar jylla ka dei ban pynlait noh mardor ia ki ba la shah kem khlem jingteh, bad dei ban scrap noh shwa ia kane ka project lynti rel kat haduh ba ngi lah ban wanrah ia ki ain ban khanglad ia ka jingrung kyrthem ki illegal immigrants.
Ka District council kam dei tang ka nong sam trading licence pathar ban pynheh tang ka pla tyngka hynrei kadei ban pyni ia ka la jong ka bor, kane kadei ka jingiuh roit ia ka bor jong ka KHADC, namar wat ka NOC ruh khlem pat ioh na ka KHADC shwa ban pyntrei ia kane ka project, lada ka KHADC ka dang sngap jar kam don jingmut ban kam ba ka dei ka pynneh pynsah ia ka jinglong trai ka jong ngi halor ka khyndew ka shyiap.
Ka District council kam dei ka agent jong no re jong no ruh hynrei kadei ka constitutional body bad ka KHADC kadei ban mih shakmat ban kren bad khanglad ia kane ka project bad lada dei ban ia tynkhuh bad ka state government lane ka central government ruh ban iada ia la ka jinglong trai ka district council dadei ban ieng rangbah. La ong u bah Adelbert Nongrum Working President KHNAM ha ka kyrwoh.
