Shillong, Lber 11: Ka jinglong president ka India ia ka G20 ka wan ha ka por kaba kongsan bad ha ka por kaba plie lad. Ki ri na kylleng ka pyrthei ki dang thmu ban shna biang kham bha na ki jingeh kiba bun kiba la wan ha kine ki lai snem ba la dep.
Na ka khlam COVID-19 haduh ka jingeh kaba mynta, bun kiba pdiang ba ka jingktah jong kine ki jingeh ka ban kham jur ia ki longkmie bad ki khynnah kynthei, kiba ktah ia ka jingshong shngain, ki lad kamaikajih bad ka koit ka khiah jong ki.
Ka jinglong president ka India ia ka G20 ka wanrah ia ka jingpeit bniah ia ka bynta jong ki longkmie bad ka jingiahap kyrdan hapdeng ki shynrang bad ki kynthei.
U Myntri Rangbah Duh, u Narendra Modi u la ban jur halor ka jingdonkam ban peit ia ka jingeh ba ki longkmie ki iakynduh ban ioh bynta ha ki jingshakri kiba iadei bad ka pisa pilain, ka jingseng kam lajong bad ka jingioh bynta ha ki kam bylla.
Hapoh ri, ka Sorkar India ka la shim ia ka rai ban buh ia ka jingpynkupbor ia ki kynthei kum ka phangpdeng jong ka ‘Atmanirbhar Bharat’, da ka jingieng skhem ban ai jingkyrshan ia ka roi ka par kaba pura jong ki ha baroh ki bynta jong ka jingim.
Ka skhim‘BetiBachaoBetiPadhao’ka la ialam sha ka jingkiew haduh 16-point ha kaba iadei bad ka jingdon ki khyllung kynthei bad shynrang naduh u snem 2014. Ka skhim MUDRA kaba ai jingiarap pisa ka don palat 70% ki nongioh jingmyntoi kiba dei ki longkmie.
Ka Mission Poshan 2.0, ka prokram ban ai jingkyrshan na ka bynta ka jingioh ka bam kaba tei ka la ai jingshakri ia 1.2 klur ki longkmie ba dang pun bad kito kiba dang don khun rit.
Ki dang bun ki sienjam, naduh ka jingtei ia ki working women’s hostel,haduh ka jingsdang ia ki prokram ai jingpyntbit, bad ki sienjam ban pynthikna ia ka jingshngain jong ki bad ka jinglait na ka shah thombor – kiba pyni ia ka jingieng skhem ka India na ka bynta ka Suraksha(Jingshngain), Suvidha (Jingsuk)bad Swabhimann (JinglahIeng Ha La Ki Kjat) jong ki longkmie.
Ha kaba iadei bad ka jingngeit tynrai jong ka ri – ka Sorkar ka la ithuh ruh ia ka jingdonkam ka ‘Nari Shakti’ban wanrah ia ka jingkylla ha ka imlang sahlang. Ka don ka jingpeit kaba kham bniah ia ka bynta jong ki longkmie kum ki nongpyntyllun ia ka roi ka par bad ki nongwanrah ia ka jingkylla, bad ym tang kiba ioh ia ka roi ka par.
Namar ka India ka dang ialam lynti ia ki jingpyrshang jong ka G20 ha u snem 2023 – ka la dei ka por ia ngi ba ngin tei halor ki kam kiba la lah ban pyndep haduh mynta, bad ban rah shakhmat ia kane ka jingthmu na ka bynta ka roi ka par kaba ialam lynti da ki longkmie.
Ngi dang khmih lynti ban wanrah ia ki kam hapoh kine ki phang:
Kaba nyngkong ka dei ban kyrshan ia ka jingioh bynta ki longkmie ha ki kam digital bad ka pisa pilain.Ha baroh kawei ka pyrthei, la janshiteng(42%)ki longkmie bad ki khynnah kynthei kim don hapoh ki kam kiba iadei bad ka pisa pilain.
Katba ka jingioh bynta jong ki ka dang kiew, ka jingiapher hapdeng ki shynrang bad kynthei ha kine ki kam kam pat duna bad ka neh ha ka 7%. Ki jingsaindur thymmai ha ki kam digital teknoloji, khamtam ha ka information &communication, ki don ia ka lad ban pynstet ia ka jingpynkupbor ia ki longkmie ha ki kam pisa.
Hynrei ka dang don ka jingiapher ha ki kam digital hapdeng ki shynrang bad kynthei, ha ka jingioh bynta ia kine bad ruh ha ka jingioh jinghikai shaphang kine. Ka India ka la niewkor ia ka jingpynioh bynta ki khynnah kynthei bad ki longkmie ha ki kam digital teknoloji lyngba ka rynsan JAM lane Jan Dhan-Aadhar-Mobile .
Kane ka la plie lad ia ki prokram ai jingiada ha ka imlang sahlang ba kin poi sha ki longkmie bad ruh ban pynkhlain ia ka jingpynkupbor ia ki longkmie ha ki kam pisa pilain. Lyngba ka G20, ngi dei ban peit ia ki rukom treikam ba khlain ba iasriem ban pynkhlain ia ka jingpynioh bynta ki longkmie ha ki kam digital bad ki kam pisa pilain.
Kaba ar ka dei ka jingpynkhlainia ka jinglah treikam ki longkmie ban ai kajuh ka bynta ia ki ha ki kam ka roi ka par. Kane ka dei kaba donkam ban plie lad ia ka jingrung, bad ban pynthikna ia ka jingbteng jong ka jingiashim bynta ki longkmie ha ka ioh ka kot bad ka imlang sahlang.
Kum ban shu kdew, watla baroh ki pdiang ba ka pule puthi ka dei ka nongrim jong ka jingpynkupbor – ha baroh kawei ka pyrthei tang 49% ki la lah ban wanrah jingryntih hapdeng ki shynrang bad kynthei ha ki jingpule primary, 42% ha ka lower secondary, bad 24% ha ka upper secondary.
Ha kylleng ka pyrthei, kumba 1.1 billion ngut ki longkmie bad ki khynnah kynthei kkim don hapoh ki kam pisapilain bad bun na kine kim don lad sha ki kam digital teknoloji. Kumjuh, ha ki ri ha kylleng ka pyrthei ki kynthei ki kham bun ha ki kam ki bym ioh jingsiew.
Kumta ka long kaba donkam bha ba ka G20 ka iatrei lang bad wanrah ia ka jingiahap jingmut bad ki kam ban weng ia kine ki jingeh hakhmat ki longkmie bad ki khynnah kynthei ha ka jingim bad ka kam.
Kaba lai ka dei ka jingplie lad ia ka jingialam lynti ki longkmie ha ki jingshim rai. Mynta, ka India ka don palat 1.90 klur ki longkmie had ki ophis pyniad kam, palat 17,000 ngut ki longkmie ki dei kiba la shah jied sha ki kynhun Panchayati Raj, bad palat 10,000 ngut ki longkmie ki don ha ki kynhun iada ri.
Kane ka rukom treikam na ka bynta ka roi ka par ba ialam lynti da ki longkmie kan pynthikna ba ki jingsngew jong ki, ki jingshem bad ki rukom long nongialam ba kyrpang jong ki, ki wan shakhmat bad wanrah ia ka rukom shim rai kaba kham bha.
Ha kaba khatduh, ka long kaba donkam ban pynthikna ia ka jingbteng jong ki jingmyntoi kiba wan na ki sienjam bapher bapher. Na ka bynta kane, ka jingpeit bniah ia ki jingtip ki bym don jingiapher hapdeng ki shynrang bad kynthei ka long kaba kongsn bha, namar ka jingpeit ia kane kan long kaba donkam na ka bynta ka jingpeit ia ki kam bad ka jingiaid sha ka jingryntih hapdeng ki shynrang bad kynthei.
Watla ki jingeh ba ka pyrthei ka la mad ki la pynsuki ia ngi ha ka jingpynurlong ia ki thong kiba iahap lang ia baroh, ka jinglong president ka India ia ka G20 ka plie lad ia ngi ba ngin pynkhreh ia ki kam na ka bynta ka ban wan jong ka roi ka par. Ha kane ka por jong ki lad kiba don, ka long kaba donkam bha ba ngin buh ia ki longkmie bad ki khynnah kynthei kum ki kongsan ha ki jingpyrshang jong ngi ban ioh ia ka lawei kaba kham bha.
