Shillong, Nailur 24: U myntri kam pynroi sor u Bah Ronni V Lyngdoh mynta ka sngi u la leit ban jurip ia ka iewduh bad ia ki saw dong jong ka ban sngewthuh kumno ban leh ha kaba yn ia treilang bad ka Hima Mylliem na ka bynta ban wan rah ia ka jingkhuid jingsuba ha kane ka iew ba heh duh hapoh jong ka Ri Khasi Jaintia.
Ha dien ba la wan jurip ia kane ka iew khamtam eh ia ka Iew Mawlong kaba la jaboh shisha, bad kumjuh u la leit ban jurip ia ka iew ka hat, u la lap da lade ba kumno kane ka iew ka long bad kaba la pynisaitmet shisha ban peit ha kaba ki pipe um kila pei bad kane ka jinglait jong ka um na ki pipe kala pynjaboh ia ka iew.
Haba kren ha ki nongthoh khubor ha dien ba la dep ban iaid sawdong kane ka iew, u Bah Lyngdoh u la ong ba ka jingwan jong u ban jngoh ia kane ka iew ka long ban tyrwa ia ka jingiatreilang hapdeng ka sorkar bad ka Hima Mylliem ban wad lad kumno ban pynittynad ia kane ka iew ban long kaba khuid ba suba kaba bit ba biang na ka bynta kiba wan iew wan hat.
Ha ka juh ka por u la kyntu ia u Syiem jong ka hima mylliem ba u dei ban bthah ia baroh ki nongshong iew ba kim dei shuh ban pyndon kam ia ki pla plastik bad u kwah ban pynlong ia kane ka iew kaba lait na ka jingdon jong ki plastic. La ong ba u Syiem u don ka bor ba lada don kiba ialeh pyrshah u lah ban weng noh ia ka Trading Licenses jong ki.
Haba jubab ia ki jingkylli ha kaba ia dei bad kane ka iew, u myntri jong ka sorkar jylla u la ong ba kane ka iew ka dei ka jong ka hima mylliem bad ka shong ha ka hima ba lada ka don kam ia ka jingiatreilang na ka liang jong ka sorkar ka long kaba la kloi ban leh ia kaba ki lah.
U Bah Ricky Nelson Syiem , u Syiem jong ka hima mylliem ha ka jingkren ka jong u la pynpaw ia ka jingsngewnguh ia u myntri jong ka sorkar jylla u ba la wan jngoh ia kane ka iew bad u ong ba na ka liang jong ka hima ka kloi ban ia treilang, haba ia dei bad ki plastic ka hukum kala wan na ka sorkar pdeng ba la shah ia ki pla plastic kiba 50micron katba la khang pyrshah ia kiba 40micron shapoh.
Ha kane ka sngi na ka liang jong ka sorkar la synran lang ia u myntri da u B Dutta Director jong ka tand pynroi sor, u Bah S Kharmalki Secretary u CEO jong ka Municipal u Bah BS Sohlya bad na ka liang jong ka hima la don lang ki myntri.
