Shillong, Jymmang 30: U Deputy Commissioner jong ka Ri Bhoi District mynta ka sngi u la ong ba ka jingiap jong ki briew na ka jingbam khawai ha ka sngi u blei ha ka shnong Nongkya hapoh jong ka Ri Bhoi District kala kiew sha ka phra ngut haduh mynta ka sngi.
Na ka liang jong ki bor ba dei peit ia ka District kala phah ia ka kynhun jong ki Doctor ban don hapoh jong ka tei ka shnong ban peit ia ka jinglong jingman ki paidbah nongshnong shnong ban sumar ia sukher ia ki briew kiba don hapdeng ka jingshitom.
Na ka liang jong u Deputy Commissioner bad u superintendent ki pulit jong ka Ri Bhoi District mynta ka sngi kila leit sha katei ka shnong bad ha kajuh ka por ki la leit jngoh ruh ia ki ba pang kiba don ha ki jaka sumar bapher bapher kum ha Nongpoh Civil Hospital, Bethany Hospital Nongpoh, Umsning CHC bad Bhoirymbong CHC.
La ong ba baroh kiba la ngat ha katei ka jingjia ba sngewsih haduh mynta kila kham iioh bor bad na ka liang jong ki doctor ruh kid a shim khia kyrpang ban peit bad sumar ia kine ki nongpang. Ha ka juh ka por na ka liang jong u Deputy Commissioner mynta ka sngi u la thung ia ka kynhun tohkit ia kaba la tip kum ka “Magisterial Inquiry” ban tohkit halor kane ka jingjia ba sngewsih. Na ka liang jong ki pulit ruh kin pynlong la ka jong ka jingtohkit.
Ka myntri ba dei peit ia ka tnad ka koit ka khiah jong ka sorkar jylla ka long Roshan Warjri, mynta ka sngi kala leit jngoh ia ki nongpang kiba shah sumar hapoh Nongpoh Civil Hospital bad kum juh hapoh jong ka Umsning CHC.
