Shillong, Rymphang 23: U Bah Sanbor Shullai MLA jong ka 19-Shillong South ha ka sngi saitjian u la leit ban peit ia ki jingtrei hapoh jong ka Konstitwensi jong u kiba la iaid sha khmat ha ka bynta kaba ar kiba la kot sha ka T.8.23 klur.
Ki skhim kiba la pyntrei ki lon ka jingtei ia ka iew die jhur kaba khlem pyndon kam dawai ha Kenches Trace Road Bishnupur ha ka jinglut kaba T.2.29 klur, ka jingtei ia ka Working Women hostel bad ka Auditorium ha Rilbong kaba la kot sha ka T.4.50 klur bad ia ka jingshna ia ka surok ban rung sha Sanker Dev College ha ka jinglut kaba T.1.43 klur.
Ha kane ka jingleit jurip la don lang ki briew na ki tnad sorkar bapher bapher, na ka PWD, SMB, MePDCL, Social Welfare, ki pulit pyniaid kali bad ki nongkit kam shnong. Haba ia dei bad ka MePDCL na ka liang jong u MLA u la ong ba ki dei ban peit halor ka jingduh light man ka por.
Na ka liang jong u MLA u la ai khublei ia ki trai jaka kiba la kloi ban ai ia ki jaka jong ki kaba la pynlong ia ki tnad sorkar ba kin lah ban pyniaid ia ki kam sha khmat, la ai khublei ruh ia ki tnad sorkar baroh kiba la pyndep ia ka kam jong ki na ka bynta ka jingmyntoi u paidbah.
