Shillong, Lber 09: U Chief Executive member ka KHADC u bah Titosstarwell Chyne haba jubab ia ka mat ia kren ba la wan rah da u MDC ka Mawhati Constituency u bah Charles Marngar hapoh ka dorbar mang tyngka jong ka KHADC u la ong ba ka District council kam pat ioh ia ka jingiasoi soskular hadpeng ka Meghalaya bad ka Assam.
Kaei kaba ki tip ka dang long tang na ka jingkren u myntri rangbah hapoh ka iing dorbar thawain ka jylla bad ki don ki mat kaba ki dang hap ban pynbeit. Halor kane ka KHADC kan khot biang ia ki khlieh nongsynshar ban ia sylok biang ia kane.
Naka liang jong u u CEM u la iathuh ruh ba na ka liang u Acting syiem ka Hima Mylliem u la phah ia ka shithi ban pynpaw ia ka jingbymhun halor ka rai jong ka sorkar bad kane hi ka dei ka nuska ka ba donkam ka ba na ka liang ka KHADC kan sa khot ia ki khlieh nongshynshar ban ia syllok biang halor kane ka bynta.
Halor ka jingbuh ia ki khyrdop jong ka Karbi Anglong District Council ha ki jaka ba hap jong ka KHADC na ka liang u CEM u la ong ba na ka liang ka Council kan sa leit ban buh ia ki khyrdop ha kine ki jaka ym ban lum pisa hynrei ban pynpaw ia ka jingdon jong ka District Council.
Mynta ka sngi ha ka ingdorbar thawain jong ka Khasi Hills Autonomous District Council (KHADC) u MDC ka Mawhati Constituency u bah Charles Marngar u la wanrah ia ka motion “The role of the Khasi Hills Autonomous District Council on Interstate Boundary” .
U bah Charles u la ong ba ka kaiphot kaba la pynpaw u Myntri rangbah hapoh ka ingdorbar thawain jong ka jylla ka dei ka kaiphot ka ba khlem ka jingtip ka District Council ,khlem ka jingtip ki khlieh nongshynshar , ha ka jingshisha ka sorkar jylla kam don hok eiei ia ki jaka puta ha ka jylla .
Ka jingleh jong u myntri rangbah ka long tang ka jingiuhroit ka jingbym khein snep bad pynkhein ia ka bor ka itiar jong ka District council kat kum ka para 20 jong ka 6th Schedule.
U bah Charles u la kdew ba lada ka ne ka jingpynbeit kan iaid kumne kane kan buh jingma ia ki wei pat ki 6 tylli ki jaka ki ban sa pynbeit kham tam ka block I,bad BlockII.
U bah Charles u la ong ba kum ka jingpynkhreh na ka bynta ka Bloc I Block II ka pynkynmaw ban hap ban sei biang biang ia ka resolutions ba la wanrah da u bah H.S Shylla ha ka 20 ?/11/2018.
Namar ba kane ka rai jong ka sorkar ym nud ban shaniah ia ka sorkar ba la ialam da u Conrad K Sangma haba ka dei ka kam iap kam im u la dep ban phah shwa sha ka District Council.
U bah Charles u la pyntip hapoh ingdorbar ba ha ka 7 tarik mynta u bnai na ka liang ka sorkar Assam ka la tih surok ha Sabuda bad shna ia ki jaka sah na ka bynta ki nongtrei jong ka.
Ka Karbi Anglong Autonomous Council ka la shna ia ki 6 tylli ki khyrdop ban lum khajna na ki nongrep synsar ,ka ba ki lum 6 tyngka shikilo u synshar ,sha ka tnad forest Assam T500 kawei kali bad ia ki pulit Assam T.300 .
