Shillong, Risaw 05: Ka kynhun pulit kaba kyrpang jong ka jylla ia kaba la tip kum ka SF-10, kaba kynthup ia ki 223 ki commandos bad 115 rangers, kila shim mynta ka sngi ka ‘Passing out Parade’ ha dien ba kila pyndep ia ka jingshah hikai kaba kyrpang ha kine ki hynriew bnai kiba la leit noh, bad ki jinghikai kiba kyrpang ban ia khun pyrshah ia ki lehnoh.
U myntri rangbah ka jylla u Dr Dr.Mukul Sangma, u la shim ia ka salute ha jaka ai jinghikai jong ka 1st MLP battalion kaba don ha Mawiong, ha ka jingiadon lang jong ka kynhun myntri, ki parliamentary secretaries ha ryngkat ki ophisar bad kiba ha iing ha sem jong kine ki samla kiba la pyndep ia kane ka jinghikai.
Haba ai khublei ia kine ki samla kiba la pyndep ia kane ka jinghikai kaba kyrpang, na ka liang jongu myntri rangbah u la ong ba kane ka kynhun pulit kaba kyrpang mynta ki long kiba la khreh ban ai ka jingshakri ia ka jylla bad ka jinghikai kaba ki ioh kam duna na kiwei pat ki para commando kaba ka pyrthei ka ai jinghikai.
U myntri rangbah u la pynkynmaw ba dei ban don ia ka mynsiem jingkitkhlieh, ka jingpyniaid ia lade ban long kiba adakar bad kane kan long ka jingiarap ban ia khun pyrshah ia kito ki nongleh kam sniew. La ong ba ka jinglong jingman ha ka synsahr khaddar ka don ka jingiadei bad ka shnong suk shong sain. Da ka jingpyndep jong kane ka kynhun pulit kaba kyrpang ia ki jinghikai kan iarap ia ka kynhun pulit ban ai ka jingiada kum ba la angnud da ki paidbah.
Haba ia dei bad bun ki jingeh, ha ka liang jong ka shongsuk shong sain, wat la kila pyndep ia ka jinghikai kaba ki la ioh ki dang don kam ban pyntbit shuh shuh ha kiba bun ki liang namar ki kam sniew ruh ki jylla na ka por sha ka por katkum ka jingkylla jong ka juk. La ong ba kan dang don shuh ka jingpynrung ia ki khun samla shynrang bad kynthei ha kane ka kynhun pulit ban dup lah ban ia ka jingiada kaba biang ia ka jylla ha ka rukom kaba biang.
U myntri rangbah u la pynpaw ia kata ka jingktah ha u, ha kaba u la pynpaw ia ka jingsngewnguh iaki kmie ki kpa kiba la ai ia ki khun jong ki ba kin rung ha kane ka kam pulit kaba kyrpang bad u laong “ to ngin iaduwai na ka bynta kine ki khun samla kaba kila shim ia ka jingshari ia ka jylla kaba eh na kaba eh tam ba u nongbuh nongthaw un ker unda sumar ia ki ha kaba ki pyndep ia kane ka kam ka jong ki”. U la ong ba ka jylla Meghalaya kan sa long ka jylla kaba suk ba sain.
Ha kane ka sngi u myntri rangbah u la pynlait paidbah ruh iaki 30 tylli ki kali jong ka SF-10 bad la sam ruh ia ka khusnam sha ki 10 ngut ki commondo kiba tbit tam. Ia kane ka kynhun pulit ba kyrpang la thaw b aka jylla ka dei ban don ia ka kynhun pulit kaba kyrpang ban ia khun ia ki lehnoh bad ban leh kumno ha ba ka don ka jingiakhih paidbah.
U Brigadier (Retd.) W.B.J Sturgeon ula ai ka jinghikai kaba kyrpang kumno ban ia khun iaki lehnoh bad kumno ban leh ia kaba don ka jingiakhih paidbah la ka long ha nongkyndong ne ha sor, kane ka jinghikai la ai da ki shipai kiba la pynbit ha kane ka kam. Ia kine commando yn phah ia ki ban ia khun pyrshah ia ki kam lehnoh bad ia kiwei pat yn dang phah training shuh shuh bad ka kynhun pulit Rapid Action Force ban pynpra ia ki paidbah ha b aka don ka jingiakhih paidbah.
