Shillong, Lber 19: Ka Press Information Bureau (PIB) Shillong mynta ka sngi ka la pynlong ia ka media workshop, ka Vartalap mynta ka sngi ha Shillong Club ha ka jingiatreilang bad ka Shillong Press Club. Ka bynta ba mynta u snem ka iadei bad ka Mang Tyngka 2022 jong ka Sorkar Pdeng ba la pynbna dang shen da ka Tnat Kam Pla Tyngka jong ka sorkar pdeng, da kaba ban khia halor ka jylla Meghalaya.
U Kongsan ha kane ka jingialang uba dei u Goods and Services Tax (GST) Commissioner, Shillong, u C Songate u la ong ba ka jinglum GST ka Jylla kalong kaba kham bun ban hashuwa ki por jong ka COVID bad ka don ha ka kyrdan kaba biang haba iadei bad ka jingpyndep ia ki thong jong ka GST.
Ha ka jingai jingkren jong u ha ka workshop mynta ka sngi, u la kren shaphang ka jingbthah ba dang shen jong ka Sorkar India ban plie ia ka jaka khaii pateng ha baroh ki GST Commissionerate ha ka ri, kynthup ka Meghalaya. “La khmih lynti ba kine ki jaka khaii pateng kin weng ia ki jingeh ba mad da ki nongkhaii barit baria,” la ong u GST Commissioner.
Ka jingkren jong ka Associate Professor, Finance, Indian Institute of Management (IIM), Shillong, ka Dr Neelam Rani halor ka mang tyngka 2022 ka la ban ia ki lad ba ka jylla ka lah ban iaid shaphrang ha ki snem ban wan. Ki jingai jingmut jong ka kilong ka jinglah ban tyngkai ia ka bording da kaba pyrkhat ia ki lad pynmih bording haduh 3000 MW na ki phra tylli ki unit ba la don lypa.
Ka Meghalaya ka lah ruh ban pyrkhat ha ka liang ka rep ka riang namar bun ki briew ki trei ha ki kam rep, ka la ong. Da kaba ong ba ka mang tyngka 2022 kalong kaba pyrkhat ia ka lawei, ka la ong ba kan long ka jingmyntoi hadien habud.
Ka Mang tyngka ka pyni ia ka slogan jong ka “Sab ka Sath, Sab ka Vikas and Sab ka Viswas” kumba la pynbna da u Myntri Rangbah duh ka ri, ka la bynrap. Ka Dr. Rani ka la kren ruh ia ki bynta jong ka PMGatishakti, MSMe, ka Pule puthi, ka rep ka riang, Start-up, digital banking bad kiwei kiwei.
Da kaba iaroh ia ka Mang Tyngka 2022, ka Assistant Professor, Department of Economics, North Eastern Hill University, ka Dr D. War Thangkhiew ka la ong ba ka lah ban long kum ka “atiar kaba khlain ban weng ia ka jingduna ha ki dak jong ka jinglong jingman ha ka imlang sahlang bad ka ioh ka kot.
Ka la kren shuh shuh shaphang ki jingbei tyngka ha ka roi ka par ba lah ban iaineh bad ka la ong ba kane kalong kaba kongsan. Haba kren shaphang ka Northeast Gross District Development Index 2021-22, ka Professor ka la ong, “Tang kawei ka district, ka East Khasi Hills, kaba la ioh ia ka kyrdan Performer bad ka la wan ha ka kyrdan kaba 57 na ki 100 tylli ki jaka ha ka thain shatei lammihngi.
Kalong kaba paw shai ba ngi donkam ia ka jingtrei borbah ha kane ka bynta.” Ka la ban ba ki Self Help Group (SHG) kilong ka khana jingjop ha Meghalaya bad ka sorkar ka pyrshang ban wanrah kajuh ki khana jingjop ha ka liang ki kam jngoh kai pyrthei lyngba ki prokram bapher bapher bad ka la tyrwa ban sdang ia ki e-bus bad e- buggy.
Ka la bynrap ruh ba ia ka bynta jong ka higher education yn sa pynbeit da ka sorkar, da kaba bynrap ba ka jylla ka donkam ia ki jaka pule ba lah ban ai ki jinghikai bapher bapher.
Ha kane ka Vartalap, kaba la pynlong da ka jingthmu ban ai jingshai halor ka jingktah jong ka mang tyngka ia ki riewpaidbah la iashim bynta da palat 30 ngut ki nongthoh khubor na ka district.
La pynlong ia ka jingialang iamir jingmut ba kynthup ia ki Nongai jinghikai bad ki nongiashim bynta hadien ba ki riewshemphang ki ladep ban ai ia ki jingsngew jong ki halor ka phang mynta ka sngi. U President jong ka Shillong Press Club, Bah David Laitphlang u la pynkut ia ka Vartalap da ki jingkren bad ki kyntien ai khublei.
