Shillong, Lber 26: U Bah Pyniaid Sing Syiem Deputy Chief Executive Member hapoh jong ka KHADC haba jubab ia ka jingkylli jong u Bah Lamphrang Blah, u la iathuh ba ka pisa kaba la ioh mynta na ka sorkar ha kaba ia dei bad ka skhim ba kyrpang na ka sorkar pdeng ka long T.34.87 klur tyngka.
Haba jubab ia ka jingkylli bynrap jong u Bah RV Lyndoh hato ka pisa ka dei tang katne ne dang sah, u Deputy CEM u la ong ba ka dang sah bad ka sorkar bad ia ka pisa kaba dang sah ka sorkar kan sa ia ha dien ka MP ilekshon.
Haba ia dei bad ki skhim ba ki MDC kin sa ioh ia mynta ym pat lah ban ong ei ei namar ka dang trei kam ka model code. La iathuh ruh hapoh ka iing dorbar ban a ka T.111 klur tyngka, ka sorkar ka la pynlait T.77.51 klur sha ki lai tylli ki District Council.
Ha kawei pat ka jingkylli kaba la wanrah da u Bah F J Lakadong, u EM ba dei peit ia ka iew ka hat u Bah Jambor War u la ong ba ka District Council kam kam don bor ban buh dor ia ki marep, haba ia dei bad ka jingshah ot kilo ki nongrep ka KHADC kan sa shim khia ia kane ka kam.
U Bah Pyniaid Sing Syiem ba bat ruh ia ka tnad Elaka, haba jubab ia ka jingkylli jong u Bah Karnes Sohshang ha kaba ia dei bad ka Khasi Hills Autonomous District(Constitution of Subordinate Council Traditional Chief and Headman)Rules 2019, la ong ba kane ka dang sah bad u Lat jong ka jylla.
Haba jubab ia ki jinglylli bynrap jong u Bah R V Lyngdoh, u Bah Pyniaid u la ong ba la leh ia kane katkum ka kyndon kaba 2 jong ka Sixth Schedule, hapoh kawei pat ka kyndon kaba 7, kane ka long ban ai ka jingithuh ia ki khlieh nongsynshar bad ban wanrah ia ka jingialang kawei ka jong ki.
