Shillong, Iaiong 15: Ka Meghalaya SSA School Association ha ka jingiadonlang ka Meghalaya 4th Teacher School Association ka la ioh ban ia kynduh ia u Commissioner bad Secretary Education Deptt u Vijay Kumar Myntri, IAS halor ban buddien ia ka jingaiti ne pyniasoh ia ka jingpyniaid ia ki Skul SSA sha ka tnad Pule Puthi.
U president ka Meghalaya SSA School Association u bah Aristotle Rymbai u la ong ba halor katei ka mat ka department ka la dep ban pynmih ia ka jingbthah ia ki SSA Schools la ki dei ki Community School, ki Private school lane ki NGOs School ba kin ai ia ka jingsngewkhia jong ki na bynta ka mon jongki ban aiti noh ia ka Management na ka SSA sha ka Education Department.
Shuh shuh u la ong ka MSSASA ka lap ba ki ba bun ki Private, Mission, NGOs ba la pyniaid da ka SSA School ka mih ka jingeh ba na ka liang jong ki kim shai haba iadei bad ka jingthmu jong ka sorkar.
U la ong ba haba iadei bad kane, ki la iakren iatai sani bha bad ki la kyrpad ruh ia u Commissioner & Secretary Education Deptt ba un ai por ia ki ba kin submit ia ka jingmut jongki.
U la ong ba na ka liang u Commissioner & Secretary Education Deptt ruh u la ai ka jingkular ha ki ba un ailad ia ki ba kin phah noh ka jingmut jongki hashuwa ban kut bnai ïaiong.
U bah Aristotle Rymbai u la ong ba ki la iakren ruh haba iadei kito ki skul ba la dep ban ai ia ka jingmut jongki. Ka MSSASA ka ai jingmut ba ka Deptt kan nang iaid shakhmat ia ka ba dei ban leh kat kum ki kyndon ka Deptt.
U la ong ruh ba ia kito ki SSA Schools ba la longtrai Private, Mission, NGOs lane Society ki ba ymlong ban ai ia ka Management sha ka Deptt. Ka MSSASA ka la ai jingmut ban ai consideration ia ka service lane ka contribution ba ki la ai baroh shi katta, ban ailad ia ki nonghikai ba kin bteng ka jingshakri jongki ha kito ki skul, da kaba ka sorkar kan ai kajuh kumba ai ia kito ki ba long ban ai sha ka Deptt.
U la ong ba ha ka jylla Meghalaya ki don shibun ki skull category, hynrei ia kine dei ban wanrah hajuh bad ka pay structure ka ba thymmai, ba kine baroh kin long beit hajuh bad ba kan nym don shuh kano kano ka jingmih surok ban dawa pynkiew tulop ne ban dawa ia ki incentive.
U bah Aristotle Rymbai u la ong ba halor kitei ki jingai jingmut jongki na ka liang u Commissioner & Secretary Education Deptt u la mynjur ban pdiang bad ha ka taiew ban wan u Commissioner & Secretary Education Deptt un sa khot biang ka jingkynduh ba kyrpang ha ka jingiadonlang ki DSEO, SDSEO bad ki ophisar ka Deptt bad baroh lai tylli ki Association.
