Shillong, Lber 21: U myntri ba dei peit ia ki kam shna surok u Martin M Danggo haba jubab ia ka jingkylli jong u Bah PN Syiem ha kaba ia dei bad ka surok na Balat sha Shella, la ong ba ka sorkar kala dep ban phah ia ka Detail Project Report (DPR) sha ka DoNER bad mynta dang ap ia ka jingmynjur jong ka sorkar pdeng.
Haba jubab ia ki jingkylli bynrap, na ka liang jong u myntri la iathuh hapoh ka iing dorbar ba ia kane ka skhim la phah sha ka DoNER ha u snem 2015-2016 bad nangta kala don ka jingbudien na ka sorkar ha kaba ia dei bad kane ka surok bad ka shithi kaba khatduh ba la phah da ka sorkar ka long ha ka 15 tarik Nailur 2017.
U myntri jong ka tnad sam umbam umdih u Bah Prestone Tynsong haba jubab ia ka jingkylli jong ka Dikkanchi D Shira ha kaba ia dei bad ki painkhana ha ki skul bapher bapher, u myntri u ong ba ka sorkar kala pyntrei kam ia kane ka skhim ha ki Upper primary School bad ha ki Lower Primary School.
Haba jubab ia ki jingkylli bynrap jong kane ka MLA, u Bah Prestone u la ong ba kumba ka paw ka department kala dep siew ia kaei kaba la pyntrei bad kiba pyntrei ia kane ka kam dei ka P.He Department bad ka MeECL. Ki painkhana ba la shna na ka bynta ki kynthei ki long 14867 bad ia ki ki shynrang ki long 13501.
La iathuh hapoh ka iing dorbar ba ia kane ka skhim la sdang ha u snem 2004-2005 ha kane ka por la mang pisa tang T.20000/- tyngka kawei ka painkhana bad ha u snem 2014 la pynkiew sha ka T.48,000/-. U myntri u la ong ba baroh ki painkhana ka sorkar ka la pynioh ruh ia ka um.
Haba ia dei bad kane na ka liang jong ka MLA ka Dikkanchi D Shira kala dawa ba dei ban phah tohkit bad ban leh ei ei halor kane ka skhim.
