New Delhi, Naitung 25: Ka Sorkar ka la ai ei ia ka LPG sha ki longkmie kiba dei na ki longiing ba duna ka ioh ka kot hapoh ka Pradhan Mantri Ujjwala Yojana (PMUY).
Shuh shuh, la ai ia ka subsidy kaba T. 300 man ka 14.2 kilo ka tyndong shet jingshet (bad katkum ba iahap na ka bynta ki tyndong shet jingshet ba 5 kg) haduh 12 sien pyndap biang kaba 14.2 kilo kaba iaryngkat bad ka tyndong shet jingshet ba la ai sha baroh ki nongpyndonkam ia ka PMUY.
Shuh shuh ki sorkar jylla ki la ai ia ka subsidy na ka bynta ka jingpyndap biang ia ki tyndong lane kiwei kiwei ki subsidy ia ki nongioh jingmyntoi jong ka PMUY.
Haduh ka 01.07.2024, palat 30.19 klur ki nongpyndonkam LPG ki la pynrung kyrteng hapoh ka skhim PAHAL. Hapoh ka Skhim PAHAL, la die ia ki tyndong shet jingshet ha ka dor bym ioh subsidy bad ia ka subsidy kaba kiba pyndonkam LPG ki dei ban ioh la phah beit beit sha ka bank account jong ki. Ia ka subsidy la phah ha ka rukom Aadhaar Transfer Compliant (ATC) lane ka Bank Transfer Compliant (BTC).
Kalong kaba donkam ban pynthikna ba kine ki jingmyntoi ki poi sha ki nongioh jingmyntoi kiba dei hok ha ka por kaba biang. Ka jingpynshisha katkum ka Aadhaar na ka bynta ki skhim Direct Benefit Transfer (DBT) ka iarap ha ka jingbeit.
Ka jingwad ha ka rukom kaba jemdor bad kaba mardor, ka jingpynshisha bad ka jingweng ia ki jingmih kyrteng arsien jong kiba dei ban ioh jingmyntoi khnang ban iaid beit ki jingpynpoi ki jingmyntoi sha kito kiba dei ban ioh ia kine.
Ban pyniar ia ka jingshisha ki nongpyndonkam, ka sorkar ha u Risaw 2023 ka la pynmih ia ki jingbthah sha ki Oil Marketing Company (OMC) ban sdang ia ka jingpynshisha katkum ka Biometric Aadhaar kaba pura ia ki nongioh jingmyntoi jong ka PMUY bad PAHAL.
Ki briew ki lah ban pyndep ia ka jingpynshisha katkum ka Aadhaar jong ki lyngba ki rukom bapher bapher. Kane ka kynthup ka jingpyndonkam ia ki mobile application ba la pynbiang da ki OMC jong ki.
Kane ka lad ka pynsuk, ka iarap ia ki briew ban pyndep ia ka kam ban pynshisha da kaba pyndonkam ia ki smart phone jong ki, khlem da donkam ban leit iakynduh ia u nongpynbiang tyndong shet jingshet ha ka rukom kaba suk bha ia ki.
Ki briew ki lah ruh ban pyndep ia ka jingpynshisha katkum ka Aadhaar ha ka por ba pynpoi ia u tyndong shet jingshet jong ki. Kane ka rukom ka iarap ruh ia ki briew ban pyndep ia ka kam khlem da donkam ban leit sha kano kano ka jaka.
Ki briew ki lah ruh ban pyndep ia ka kam pynshisha da kaba leit sha ka jaka treikam jong u nongpynbiang tyndong shet jingshet kaba ai kawei pat ka lad ia kito ki bym don ha ka por ba pynpoi ia ki tyndong shet jingshet lane kiba kwah ban leit hi dalade ban pyndep ia ka kam.
La pynshlur ia baroh ki nongpyndonkam LPG ban pyndep noh ia ka jingpynshisha katkum ka aadhaar da kaba pyndonkam ia kano kano ka rukom ha la ka jingsuk jong ki.
Kane ka rukom treikam kaba laitluid ka pynthikna ba ki briew ki lah ban jied ia kano kano ka rukom bad ka por katkum ka jingbit jingbiang jong ki. La pynlong ia ka jingpynshisha ia ka Biometric Aadhaar (palat 35 lak ki nongioh jingmyntoi jong ka PMUY) ha ki Viksit Bharat SankalpYatra camp.
La sdang ia ki kam ban pynshisha ia ki Aadhaar ha ki tyngkong iing jong ki briew kum shi bynta ki jingjurip ia ka jingshngain bad ki jaka kaba dang iaid mynta ruh. Ym shym la pynsangeh ia ka jingshakri lane ka jingmyntoi jong ki briew ki bym shym la pyndep ia ki jingshisha biometric jong ki.
Ia kane ka jingtip la ai da u myntri khynneh ka tnad Petroleum bad Natural u Suresh Gopi, ha ka jubab kaba shu thoh ha Lok Sabha mynta ka sngi.
