Shillong, Rymphang 23: Ka seng samla pule ka Khasi Student’s Union (KSU) ka dawa na ka sorkar pdentg bad kum juh na ka sorkar jylla ba ka dei ban pyntrei kam noh ia ka Inner Line Permit ha kane ka jylla Meghalaya, long kiba la kreh ban ia kynduh ia kino kino ki jingeh.
Haba kren ha ki lat pathai khubor ha dien ba la dep ka jingjied ia ki nongkit kam kiba thymmai na ka bynta u snem 2020-23, u samla Lambokstar Well Marngar president u ba la shah jied khlem da don ba ialeh pyrshah ha ka sien kaba ar, la ong ba ka seng kan sa pynjur ia ki jingiakhih ban pynioh ia ka ILP ha kane ka jylla Meghalaya.
U President ka KSU u la ong ba kane ka jingeh ha kaba ia dei bad ka jingwan buhai shnong jong ki briew na shabar ka jylla ka long long da ki bun bun phew snem bad kane ka khubor kaba ka KSU ka kwah ban phah mynta ka long ka sorkar pdeng bad ka sorkar jylla ki dei ban pyntrei kam noh ia ka ILP ne mat ia ki jingiakhih na ki paidbah ka jylla.
Ka long kaei kaei kaba ym lah ban sngewthuh ba ka sorkar pdeng ka ong ba kin dang bishar bniah ia ka jingdawa ILP ha ka jingiakynduh ka sorkar jylla bad u mytnri ka sorkar pdeng u Amit Shah hapoh ka jingialam jong u myntri rangbah ka jylla u Conrad K Sangma ia ka kynhun MDA.
Ka long kaei kaei kaba sngewlyngoh ba kumno ka sorkar ka pyntrei kam ia ka ILP ha ka jylla Manipur khlem da bishar bniah katba ha Meghalaya ki ong hap ban bishar bniah, kane ka long kaba yn nym lah ban pdiang, la ong u President ka KSU.
U President ka KSU u la pynkynmaw ia ka sorkar pdeng ba ka iing dorbar tahwain ka jylla kala shim ia ka rai ban pyntrei kam ia ka ILP ha ka jylla Meghalaya kila dei ban burom ia ka jingsngew bad ka jingangnud ki paidbah ka jylla Meghalaya.
La ong ba kane ka kynhun trei kam jong ka seng kaba dang shah jied thymmai kan shong ha kane ka taiew ban wan ban ia kren ia ki jingiakhih ban pynbor ia ka sorkar ban pyntrei kam ia ka ILP ha kane ka jylla Meghalaya. Ki jingiakhih kin long kiba jai jai hynrei kan shong ha ka jinglong jignman, la ong kaba don kam ha kane ka por don kam ia ka jingpynbor na u paidbah.
Naduh u Nohprah jong u snem 2019 ka seng kala pynlong ia ki jingialang paidbah ban pynsngewthuh ia ki paidbah bad kane kin leit ruh sha Garo Hills ban pan ia ka jingkyrshan na ki paidbah.La ong ba ka jingpdiang ka sorkar pdeng ia ka Citizenship (Amendment) Act, 2019 kane ka long ka jingma kaba khraw ia ki rit paid.
La pynpaw ba ka CAA ka dei kaba pynshlur iaki briew kiba na bar ri ban rung sha kane ka jylla bad ia kane la iohi ia kaei kaba la jia ha ki khyndait sngi ha kaba ki riew paidbah bad ki BSF ruh kila mynsaw, la ong ba lada ka sorkar pdeng bad ka sorkar jylla kam lah ban pynbeit ia kane ka jingeh kim ban se ban pyntrei kam hi ban pynbeit.
Ka jingialang jong ka CEC kan sa shong kin sa ia pyrkhat kumno ban leh ryngkat ka jingiadon lang kiwei ki seng kum ka FKJGP, RBYF bad ka HNYF ban pynkhlain ia ka jingdawa ILP ha ka jylla la ong u samla Lambokstar Well Marngar.
