Shillong, Naitung 18: Ka jingialang jong ka seng UDP kaba la long mynta ka sngi kala shim ia ka rai ban pynieng ia u Bah Pius Marwein na ka seng ha kane ka elekshon shiteng samoi hapoh jong ka 35- Ranikor konstitwensi.
Ha kane ka jingialang na ka liang jong ka UDP, kala kyrpad ia u Bah Pynshngianglang Syiem Chairman jong ka PDF ba un ai ka jingkyrshan ia u kyrtong kaba ka UDP ka pynieng bad ka party kan sa pyrkhat da kumwei pat ha kaba ia dei bad ka elekshon MDC kaban sa wan na Mawsynram.
Haba kren sha ki nongthoh khubor hadien ba la wai ka jingiakren bad u Bah Pynshngainlang Syiem mynta ka sngi, u General secretary ka UDP u Dr Jemino Mawthoh u la ong ba hadien ba la iathir sani bha, ka party kala rai ban pynieng ia u Bah Pius Marwein uba la jan poi sha ka thong ha ka elekshon ba dang shu dep ba un long biang u kyrtong ha kane ka elekshon MLA shiteng samoi na Ranikor.
Ka UDP kala rai ba u Bah Pius Marwein un long u kyrtong ka party ha kane ka elekshon MLA kaban sa long ha Ranikor bad la kyrpad ia u Bah Pynshngainlang ba un ai lang ia ka jingkyrshan, la kren shai u Dr Jemino general secretary jong ka UDP.
U Dr Jemino u la khot lang ruh ia baroh ki seng riewlum ban long kawei ban iakyrshan ia u Bah Pius khnang ba un pynthikna ban ioh ia ka jingjop ha kane ka elekshon. Hynrei ha kawei ka liang, haba kren hadien ba la mih na ka jingialang, u Bah Pynshngain u la ong ba um pat rai ban kyrshan ne em ia u kyrtong ka UDP ne ban nym iakhun hynrei u ieh ha ka jingstad ka UDP.
Katba na ka liang jong u Bah Pynshngianlang u la ong ba un iaid shakhmat ban iakynduh shwa ia ki paidbah shwa ba un shim ia ka rai ban ialeh ne em ia kane ka elekshon shiteng samoi na Ranikor, u la ong ba un ia kynduh ia ki nongkyrshan baroh bad ka rai ka shong ha u paidbah.
