Shillong, Lber 19: Ka Umshit kaba don ha Jakrem kaba hap hapoh jong ka South West Khasi Hills District kala khring ia ki briew na kylleng ka Ri Khasi ban leit ban sum sha kane ka jaka namar ha kane ka jaka don ka um ba khluid kaba mih na ka mariang.
Ha kane ka jaka mynta kila don ki kamra sum bala shna kyrpang ia ki shynrang bad ia ki kynthei ba kin ioh ban sum ha ki kamra ha ka umshit kaba mih na ki synrang maw jong katei ka jaka, hynrei ki kamra ban sum kim shym long katkum ki jak sum katkum kane ka juk kaba mynta.
Ki kamra sum kim don ia ki jaka wan jain ban bujli ynda la dep sum bad ka jingbuh ia ki pipe um ka long kaba lyngkot ha kaba ki nongleit sum ki shem jingeh namar ki hap ban dem, kane ka jingbym biang kala buh ia ki briew ba leit sum ha ka jingeh khamtam ki jaka buh jain ban sum.
Ha katei ka jaka la shna ruh ia ka pung um ba ki briew kiba leit sum kila ban jngi wat la kam dei kaba heh hynrei kala iarap shibun ia ki nongleit kai sha katei ka jaka, ka dor ba la shim mynta ka long T.50/- tyngka kabai rung bad T.100/- tyngka ban jngi, kiba leit kim sngew ei ei ban siew ia katei ka dor kaba la buh kaba ki kwah ka long ban kham pynbha ia ki kamra sum katkum kane ka juk kaba mynta.
Hapoh kine 20 snem kiba la leit ha dien ba la shna ia ki jaka sum kala khriang ia ki briew na kylleng ki bynta jong ka Ri Khasi ban leit sum sha kane ka jaka bad hapoh kine ki shiphew snem na ka liang jong ka Block Mawkyrwat kala shna bha ia ka lynti ban iaid sha katei ka jaka na ka skhim SGRY-1 bad ia ka jingkieng ban leit sha shiliang kawah.
