Shillong, Lber 26: U Chief Executive Member jong ka KHADC u Bah Teinwell Dkhar haba jubab ia ka resolution kaba la wan rah da u Bah Karnes Sohshang na MDC ka Mawkyrwat, u la ong ba ym don kam ban wanrah ia ka Resolution namar ka sorkar kala dep ban leh.
Na ka liang jong u CEM ka KHADC, u la ong ba ka District Council ha ka por ba ka dang don ia ka skul step hapoh ka jingpeit jong ka, kala bethah ia baroh ba kawei na ki sobjek pule ka dei ban long ka ktien khasi, wat ha dien ba kam don shuh bad ka District Council ruh ka dang bethah ia ki skul ba dei ban don ia ka jingpule ia ka ktien khasi.
Hynrei kumba ka long mynta ki kmie ki kpa kila phah skul ia ki khun ha ki skul phareng ban ia beh ia kane ka jingkylla jong ka por, hynrei ki kmie ki kpa ki dei ban hikai thoh khasi iala ki jong ki khun ha iing ha sem, u la ong ba ha ka jylla Meghalaya ki don tang ar tylli ki ktien ka ktien khasi bad Garo.
Haba ia dei bad kane ka Resolution, ban dawa ban pynrung ia ka ktien khasi ha ka Eight Schedule jong ka riti synshar jong ka Ri India kam don kam shuh namar ka sorkar ka la dep ban leh ia kane, kaei kaba ka KHADC kan leh kan long ba kan budien ia kane lada ka sorkar kam lah lada don kam ban leit da ka kynhun ruh ki hap ban leit.
Ha dien bala ioh ia ka jubab kaba shai na u CEM jong ka KHADC na ka liang jong u Bah Karnes Sohshong MDC jong ka Mawkyrwat u la weng noh ia kane ka Resolution kaba u la wan rahmynta ka sngi hapoh ka iing dorbar jong ka KHADC.
