Shillong, Iaiong 16: Ki shipai BSF kiba don ha Borsora kila ioh ban kem lait ngut ki khar Bangladesh katba ki dang rung sha India, Kine kiba la shah kem ki long u Babil Marak 28 snem, u Nishir Marak 30 snem bad u Pumur R Marak 25 snem kine baroh ki dei na ka shnong Berangasora jong ka Sunamganj District jong ka Ri Bangladesh.
Haba la talasi na ka met jong kine ki lai ngut ki BSF kila ioh ban kurup T.760 tyngka ka pisa India, ar tylli ki mobile bad saw tylli ki sim kard Bangla bad na ka pla jong ki kaba ki rah ki don ki jain phong.
Ha ka jingtohkit jong ki shipai BSF kine ki briew kila phla ba ka jingwan jong ki ka long ban leit sha Nongjri ban leit wad ia ka bai bylla jong ki kaba ki trei dewiong kaba hap hapoh jong ka South West KHasi Hills District. Ki BSF kila aiti ia ki sha ki bor jong ka ain ban leh ia kaba don kam.
