Resubelpara, Lber 26: Ban wanrah ia ki jingtrei kam jong ka sorkar kham sha jan jong u paidbah, u myntri rangbah jong ka jylla u Dr Mukul Sangma u la plie ia ka Kharkutta Police station ha ka sngi saitjian ha kaba da ki hajar ngut ki paidbah kila ia tuid sha kane ka jingplie ia kane ka police station.
Haba kren ha kane ka jingialang paidbah na ka liang jong u myntri rangbah u la pynpaw ia ka jingsngew kmen ka jong u ba u la lah ban plie ia kane ka police station na ka bynta ban kham suk ha kaba pyniaid beit iaid ryntih ia ka shong suk shong sain ha kane ka dong bad ka thian. Ka sorkar kala ialeh ban pynioh ia shibun ki kam pynroi hynrei khlem ka jingshong suk shongsain ki kam pynroi baroh kin sa dien.
Da ka jingdon jong kane ka police station kan long ruh kum ka jaka ai jinghikai ia ki samla kane ka dong bad ka thain kiba wad kam ha ki kam ap pahara, haba ia dei bad ka jingtrei kam jong ki pulit u myntri rangbah u la ong ba ka jingtrei kam jong ki ka long ba ki don hapdeng ka jingeh kaba khraw kaba ki hap ban ia khun pyrshah, haba ki jingeh ki ban ka don hateng hateng ka jingbakla na ka liang jong ki pulit, hynrei ia kine baroh yn sa leh katkum ki kyndon jong ka ain.
U myntri rangbah u la ong ba ka sorkar kala dep ban peit bniah, kino ki jaka kiba ka jylla ka dang sah dien bad ha dien ba la dep ban peit bniah kala shim ia ka rai ban plie ia ki police station, ki Block bad ki Civil Sub-Division, ka sorkar ka leh ia kaba don kam ha khmat eh na ka bynta ka jingmyntoi jong ki paidbah, hynrei ki dang don bun kiei kiei kiba ka sorkar ka dei ban leh ha kaba ia dei bad ki kam pynroi.
U myntri rangbah u la ong ba u la tip ba ki paidbah kane ka thian Kharkutta kila don kam palat ia ka CHC, ha kane ka sngi u myntri rangbah u la pynbna ba ia ka PHC jong kane ka jaka shen yn sa kyntiew kyrdan noh sha ka CHC. Ka Kharkutta Constituency ka dei kawei na kiba heh tam bad ia ka khap bad ka jylla Assam, dei na kane ka daw ba ka sorkar kala pynmih ia ka skhim Inter-State Border Area Development Programme (ISBADP) bad dei lyngba jong kane ka skhim ia ki kam pynroi baroh la pyntrei.
Ha kane ka sngi la don lang u myntri kam poh iing u Bah H.D.R Lyngdoh, Government Chief Whip W.D. Sangma, Parliamentary Secretaries, Cherak W. Momin, Brigady Marak, Samuel M. Sangma bad Marthon J. Sangma, Ka Chairman jong ka State Development Reforms Commission, Bluebell R. Sangma, u DGP Dr. S.B. Singh, u DIG Western Range Mukesh Singh, North Garo Hills Deputy Commissioner S.C. Sadhu bad uSuperintendent ki Police u Dalton P. Marak lem bad kiwei kiwei ki heh sorkar.
