Shillong, Nailar 28: U Pa,Im Ainam Manik Syiem, Syiem ba shipor jong ka Hima Mylliem u khot u wer ia ki khun ki hajar jong ka Hima ba kin ia poi sha ka dorbar hima ka ban long ha ka 7th Nailur 2018 ha Madan Polo.
Haba kren ha ki lat pathai khubor mynta ka sngi ha ka jingiadon lang kiba khraw batri jong ka Hima, u la ong ba ka hima kala khot ia kane ka dorbar hima mynta ka kynti ka long ban iakren ia ki kam ki jam jong ka hima bad ban wanrah ia ka jingsngewjan ha pdeng ka Hima bad ki khun ki hajar.
La ong ba ka dorbar hima ka long kaba don kam tam, hapoh jong kano kano ka hima, ka Hima Mylliem kala pynlong ia ka dorbar hima ha u snem 2000 mynshuwa bad mynta ha dien 18 snem ka hima kan ioh biang ia kane ka dorbar hima.
Na ka liang jong u Syiem u la maitphang ba ki mat ban ia kren ha kane ka dorbar hima kan long halor ka kam pud kam sam bad ka jylla Assam namar ka hima ia ka ia khap bad ka jylla Assam. Ha kane ka dorbar hima kin ia kren ia ki kam kiba ia dei bad ka Hima ba ki khun ki hajar ki dei ban tip.
Na ka liang jong ka Hima, ka pynbna ruh ba baroh ki iew ki hat kiba hap hapoh jong ka Hima Mylliem kin khanglut ha katei ka sngi bad khamtam eh ka Iewduh. Na ka liang jong u Syiem bad ki bakhraw batri ki khot kiwer ia baroh ki nongsynshar ba kin ia poi lang ha kane ka sngi.
