Shillong, Lber Ka seng JSU War Jaintia Circle bad ka Syndai Unit ha ryngkat bad ka bor shnong ki lah hiar ban khynra na phang iaki mynder ri ki bymdei na ka jylla bad naka ri jong ngi kiba wan buhai shnong ha poh ka shnong Lakroh.
Kane ka jingkhynra ki dkhot ka seng haka jingdon lang ryngkat ki dkhot ka bor shnong ki lah khynra iaki kot ki sla iaki poi ei kiba thaw lad ban shong ei bad leh trai hapoh ka shnong Lakroh kaba don ha Amlarem Sub Division kaba don khappud bad ka ri Bangladesh.
Na liang ki nongialam ka seng JSU hadien ba ki lah ioh jingtip na ki trai shnong ba kine ki mynder ri kiba don hapoh ka shnong ki ba lah thmu ban shna sa ia ka ing mane Blei kaba heh hapoh u pud u sam ka shnong khlem da ioh bor na ki bor shnong bad ka seng ka lah pynsangeh mardor ia kane ka jingtei be aiñ kaba lah shu leh donbor kine ki mynder.
Ka seng JSU ha ryngkat bad ki bor shnong kin sa shnong pyrkhat bad ban pynsngew sha ki bor ka aiñ ban khanglad iaki khar poi ei na ka jingwan buhai shnong bad na liang ka seng ka lah beh krad ia kito ki bym don hok ban shong ban sah hapoh ka shnong bad hapoh ka thaiñ hi baroh kawei.
Ka seng ka pynpaw ruh iaka jingsngew nguh ia ki nongialam shnong Lakroh kiba lah kloi ban pyntip sha ka seng ban ia treilang ban beh krad ia kine ki khar poi ei na ka shnong bad ka seng ka kyntu iaki wei pat ki dkhot ka bor shnong hapoh ka Bri u Hynñiewtrep ba ki dei ban mih sha khmat ban ia treilang bad ki sengbhalang bad ki bor ka aiñ khnang ban ioh khanglad na ka jingbuhai shnong ki mynder.
