Ampati, Iaiong 16: Ha ka sngi saitjian jan meit ka eriong erngit kala khyrwit kynsan ia ki katto katne ki bynta jong ka South West Garo Hills District ha kaba da ki spah tylli ki iing ki sem jong ki briew kila julor ha kane ka jinglynshop jong ka mariang.
Ha kane ka jingjur jong u slap kala don ruh ka jingjulor jong ki jingkieng iaid kali ha ka jingshah rongha ka um bad kumjuh ia ki jingthung jngtep jong ki nongrep, ki dieng post eletrik bad bun kiwei kiwei ki jingtei jong ka sorkar.
Na ka liang jong ki bor ba dei peit ia ka District administration kila ong haduh mynta kim pat lah ban ong haduh katno ka jingjulor namar ba ki briew sorkar khamtam ki Gram sevak ki dang jurip ia kane ka jingshah lynshop ha ka mariang.
Ki jaka kiba la shah ktah ha kane ka jingleh ka mariang ki long kum ka, Salmanpara, Anangpara, Purakhasia, Hulukona bad Chapahati kiba hap hapoh jong ka Zikzak C&RD block bad katto katne ki bynta jong ka Ampati, Monabari bad Chiringpara kiba hap hapoh jong ka Betasing Block. Ka Disrict kala shong dum namar ba la la khyllem ki dieng post eletrik.
Na ka liang jong u Deputy Commissioner la bethah ia baroh ki ophisar ba kin kham pynkloi ban phah ia ka kaiphot ha kaba ia dei bad kane ka jingshah pynjulor ha ka mariang khnang ba kin dup lah ban phah kham kloi ia ki jingpyntip sha ka sorkar na ka bynta ban ioh ai jingiarap ia ki paidbah kiba la shah pynjor ia ki iing ki sem ha ka mariang.
