Shillong, Kyllalyngkot 29: Ha dien ka jingiakhih ban shong kyllain mungor ar sngi linter ha khmat jong ka ophis NIOS kaba don ha Shillong, ka seng ki nonghikai Meghalaya SSA Schools Association (MSSASA) kaba ki la pynlong ha ka 24 bad 25 tarik mynta u bnai kila sdang sa ia ka jingiakhih da kaba phah ia ka shithi jingujor sha ka ophis jong u myntri rangbah duh jong ka Ri, u Narendra Modi ban ujor ia ka jingbakla jong ka NIOS ha kaba pynmih ia ka result jong ka Diploma in Elementary Education (D.El.Ed) jong u snem 3013.
Ka seng MSSASA ka sngew dei ban leh ia kane namar ba ka NIOS ka dei ka Autonomous Institution kaba hap hapoh ka jingpeit jong ka Ministry of Human Resource Development (MHRD) jong ka sorkar pdeng bad ia u Chairman jong ka NIOS kaba don ha Noida, Uttar Pradesh u Dr. Chandra Bhushan Sharma ym shym la lah ban pynbeit ia kane ka jingeh. Ia kane ka jingphah shithi sha u myntri rangbah duh jong ka Ri kin sdang la shai ka sngi ha duh ka 4 tarik jong u bnai ban wan.
Ka jingkwah jong ka seng ka long ba u myntri rangbah duh jong ka Ri un tular lem ia kane ka kam da kaba bethah ia u myntri ba dei peit ia ka MHRD u Prakash Javadekar u balong ruh u President jong ka National Institute of Open Schooling (NIOS) society ba un iakren bad u Chairman jong ka NIOS halor kane ka kam ban pynbeit.
Ka jingpynbakla jong ka NIOS ia ka Result jong ka D.El.Ed kala wanrah ia shibun ki jingeh ia ki nonghikai skul State Mission Authority Meghalaya Sarva Shiksha Abhiyan (SEMAM,SSA) kiba ha kane ka jylla ha kaba ia dei bad ka jingpynbna jong ka sorkar pdeng ban pynkiew ia ka jingsiew ia ki nonghikai SSA ha kane ka jylla.
Baroh ki nonghikai skul SSA jong ka Jylla Meghalaya kila shim ia ka rai ba kin pyntip sha u myntri rangbah duh jong ka Ri ha kaba ia dei bad kane ka jingeh kaba ki ia kynduh kane ka long katkum ka kyrwoh kaba la phah da u president ka MSSASA u Bah Aristotle C. Rymbai.
