Shillong, Naiwieng 28: Ka skul bah North Eastern Hill University mynta ka sngi kala pynlong ia ka jingpynkup burom ia ki samla pule kiba la pyndep ia ka jingpule jong ki ha ka “Convocation XXV” hapoh jong katei ka skul bahha kaba u Lat jong ka jylla u Tathagata Roy la long u kongsan bad u myntri rangbah ka jylla u Conrad K sangma kum u symbut kongsan.
Ha ka jingkren jong u Lat ka jylla u la kyntu ia ki samla pule ba kin peit beit sha ka thong ban kiew ha ka jingim, ka por jinglong samla ka dei ka por ban shim ia ka kabu bad ha dien ba la mih na ki jaka pule kin ia kynduh ia ki jingeh bad kane ka long shibynta jong ka jingim u la ong.
Na ka liang jong u Lat ka jylla u la ai ka jingkitbok kitrywiang ia ki samla pule kiba la pyndep ia ka jingpule ka jong ki bad ha ka juh ka por u la kyntu ba kin pyndon kam ia ka sap ka phong kaba ki don na ka bynta ka jingmyntoi ha ka imlang sahlang.
U Myntri Rangbah ka jylla u Cornad K Sangma ha ka jingkren jong u la ba ki samla ki dei ban pyndon kam ia ka bor jong kin a ka bynta ban kyntiew ia ka ioh ka kot jong ka jylla bad ka Ri baroh kawei. Ka Ri India ka dei ka Ri kaba dang lung bad ka shong ha ka kti jong ki samla ban wanrah ia ka jingkylla ha ka Ri.
U Myntri Rangbah ka jylla Meghalaya u la ban jur ia kine ki samla kiba la pyndep ia ka jingpule jong ki ba kin long ki nongai kam ym ki nongwad kam khnangba ka ioh ka lot jong ka Ri kan kiew. Ha kane ka sngi u myntri rangbah u la ban jur ia kawei ka phang ba don kam ban ia treilang ha pdeng ka sorkar bad ki haka pule na ka bynta ban lah ban wanrah ia ki polisi kiba biang.
La ong ba ka sorkar jylla kala iateh kular bad ka NEHU ban wad bniah ha kaba ia dei bad ka rep ka riang ha ka jylla da kaba pyndon kam ia ki kot ki bor kiba dei katkum kane ka juk kaba mynta. La ong ba ka dang shatei lam mihngi jong ka Ri ka don shibun ki lad ki lynti ban leh don kam ia ka jingtrei shitom bad long kiba iaishah.
Ia ka jingkren pdiang burom la aid a u Professor S.K. Srivastava, Vice-Chancellor NEHU.Kiwei kiba la ia don lang ha kane ka sngi ki long u Professor H. Lamin, Pro Vice-Chancellor NEHU, Shillong, Professor G. Singaiah, Pro Vice Chancellor NEHU Tura, ryngkat ki kmie ki kpa jong ki khynnah baroh kiba la ioh ia ka jingpynkup burom ha kane ka sngi ki long 8653 ngut ha kane ka Convocation XXV jong kane ka skul bah NEHU mynta ka sngi.
