Shillong, Naitung 19: U Director ka tnad ka koit ka khiah u Dr Aman War mynta ka sngi u la iathuh ba kiba la test COVID-19 positive mynta ka sngi ki long 32 ngut, ha East Khasi Hills 31 ngut, na kine 29 ngut ki dei ki BSF, u wei ba thiah pang ha NEIGRIHMS bad u wei dei ba wan phai na sha bar.u wei pat u dei na Ri Bhoi District na Khanapara.
La iathuh ba ka jingdon ki ba shitom COVID-19 ha East Khasi Hills baroh ki long 343 ngut, na kine 268 ngut ki dei ki shipai BSF, 61 ngut ki dei kiwei bad 14 ngut ki dei na ki kynhun shipai bapher bapher kiba don ha kane ka nongbah Shillong.
Ha kiwei ki District ka Ri Bhoi District kala long 36 ngut, East Jiantia Hills 2 ngut, West Garo Hills 11 ngut, South West Garo Hills 1, South Garo Hills 2, East Garo Hills 1 bad North Garo Hills 1.
La iathuh ba baroh kiba shitom COVID-19 ha kane ka jylla Meghalaya haduh ka por 2 baje noh phai sngi mynta ka sngi ki long 397 ngut, kiba la koit ki long 49 ngut. Na kine kiba shitom kiba la don ha ki Hospital mynta, ki long 19 ngut ha Civil Hospital Shillong bad 13 ngut ki don ha NEIGRIHMS hospital.
