Shillong, Jylliew 04: Kum
shi bynta ka jingwan jngoh jong ka 15th Finance Commission ba la khlieh da u Chairman, N.K. Singh ia ka jylla Meghalaya mynta ka sngi la pynlong jingialang bad ki dkhot jong ki kynhun na ka Trade and Industry jong ka jylla.
Ka Commission ka la ioh jingtip ba, Ka sorkar Meghalaya ka la plie ia ka ‘Industrial Policy-2012’, kaba kular ban ai song jingiarap, jingmyntoi sha ki kam ba iadei bad ka jingshna tiar ba la pyniaid da ki longkmie kiba treikam lajong, ki briew kiba don jingduna ha ki dkhot met ha kaba kin ioh 10% ka jingiarap na ka sorkar jylla ha ka jingseng kam, ki jingiarap ban seng ia ki jaka trei ha ki thain nongkyndong kan long 15 % na ka State Capital Investment Subsidy bad kiwei kiwei.
Ka jingpeit bniah ka Commission: Kumba long kiwei ki hynniew tylli ki jylla jong ka thain shatei lammihngi, ka Meghalaya ruh ka mad ia ki jingduhnong na ka jingjngai jong ka na ki jaka ba kongsan jong ka ri. Kan hap ban kyntiew ym tang ha ka khaii pateng bad kiwei kiwei ki jylla jong ka thain shatei lammihngi hynrei bad ka ri hi baroh kawei kumjuh ruh ka khaii pateng shabar ruh bad ki ri ba marjan kum ka ri Bangladesh.
Ka jylla Meghalaya ka donkam ban pynkhlain ia ki jingdonkam jong ka ban khring ia ki nongbei tyngka nabar ri ha ka jylla. Ka jingbha ki lynti ki synkien kalong kaba donkam ban kyntiew ia ki kam jngoh kai pyrthei, ban pyniasoh ia ki jaka khaii pateng ha thain khappud, bad ban kyrshan ia ka ioh ka kot, ka imlang sahlang bad ki jingdonkam ha ka jingshngain bad ka suk ka sain.
Ka jylla Meghalaya ka donkam ban shim kabu ia ki jingmyntoi bapher bapher na ki scheme bei tyngka jong ka sorkar pdeng kum ka ASIDE (Assistance to States for Development of Export Infrastructure), EDF-NER (Export Development Fund for North East Region), bad kiwei kiwei ban kyntiew ia ka jingkhaii bad ka ri Banglades. Ka Commission ka la pynthikna ba kan khmih ia baroh ki mat ba la pynsngew da ki dkhot jong ka Trade and Industry haba ki ai ia ki jingmut ki jong ki.
