Baghmara, Jylliew 19: Ia ka jingrakhe jong ka jingdap 25 snem jong ka South Garo Hills District la pynkut mynta ka sngi ha Baghmara ha kaba la pynphuh pynphing ia kane ka sngi da shibun ki jingialehkai bad ki jingshadf.
Ha kane ka sngi la pynlong ia ka jingkynmaw burom kaba kyrpang ia u MLA barim jong kane ka jaka u Lotsing Sangma u ba la bam kwai ha dwar u blei, dei hapoh ka jingialam ka jong u ba la thaw ia ka District Demand Committee u ba long ruh u myntri jong ka sorkar ha katei ka por. Ha kane ka sngi la pyndon burom kyrpang ia u.
Shuwa jong ka snem 1992 ka Baghmara ka dei tang ka Civil Sub Division hynrei da ka jingdawa jong ki paidbah hapoh ka jingialam jong u Lotsing la ioh ia ka South Garo Hills District ha ka 18th Jylliew 1992 bad mynta kala kot sha ka 25 snem.
Ha kane ka sngi pynkut ia kane ka jingrakhe jong ka Jubilee Rupa jong ka District la don lang u MLA jong kane ka jaka u u ba bat ia ka kam Parliamentary Secretary, Civil Defence, u Samuel M. Sangma u Parliamentary Secretary, C&RD, Rophul S. Marak u ba la long u kongsan ha kane ka sngi bad ka MLA jong ka Chokpot kaba dei ka Chairperson jong ka SDRC, ka Bluebell R. Sangma, u Chairman, Baghmara Municipal Board Surosh R. Marak bad shibun kiwei kiwei ki riew rangbah.
Ha ka jingkren jong u Samuel M. Sangma, u la kdew ia ki kam pynroi kiba la wan sha kane ka District ha kine ki 25 snem mynta bad ha ka juh ka por u la pynpaw ia ka jingsngewkhia ka jong u ia ka jingsniew jong ka surok NH-62, hynrei u la ong ba mynta ka company JICA kan sa shna ia kane ka surok, u la ong ba u don ka jingkyrmen ba ki kam pynroi kin sa urlong ha kane ka dong bad ka thain kaba dang sah dien.
Ha ka jingkren jong u Rophul S. Marak ka Bluebell R. Sangma kila pynpaw ia ka juh ka jingsngew bad kila ai ka jingkular ha khmat ki paidbah ba kin ia trei lang baroh na ka bynta ka roi ka par jong kane ka District kaba don lai tylli ki MLA Constituency. Kiwei kiba la ia don lang ki long u Chairman jong ka Baghmara Municipal Board,u Surosh R. Marak, ka Deputy Commssioner jong ka South Garo Hills Deputy Commissioner, ka Shella N. Marak.
