Kyntait u Myntri Rangbah, Dr Mukul ia ka jingkam ka seng HNLC, ong,ka dei ka khubor lamler

Shillong, Jymmang 21: U myntri rangbah jong ka jylla u Dr Mukul Sangma haba pynshai halor ka jingkynnoh jong ka seng HNLC, u myntri rangbah u la ong ba ka jingkam jong ka seng lehnoh kaba ka bym dei, kaba lamler bad kaba la shu thaw, la ong  u myntri rangbah ha kyrwoh kaba la pynlait mynta ka sngi sha ki lad pathai khubor.

Ha ka kyrwoh kaba la phah mynta ka sngi, ban pynshai ia ka jingkynnoh jong ka seng HNLC ba u myntri rangbah u la phah ia u ksiang sha katei ka seng ka dei kaba bakla, kaba la shuthaw bad kaba lamler.

Ka sorkar Meghalaya hapoh ka jingialam jong u Dr Mukul, ka shai bha ha kaba ia dei bad ki lehnoh kiba don ha kane ka jylla. Ka sorkar ka ailad ia kino kino kiba don ha ki seng lehnoh ba kin wan ban pyndem bad ba kin wan noh sha ka jingim kaba thymmai kumba long lem kiwei na ka bynta ban wan rah ia ka roi ka par ha ka jylla. Ka lynti ka don ia kino kino ki briew kiba don ha ki seng lehnoh kyntup ia ka briew jong ka HNLC lada ki wan ban pyndem.

Ka lynti ka don na ka bynta jong kito baroh kiba kwah ia ka jingshong suk shong sain bad kiba kwah ba ka roi ka par kan kiew, ka sorkar jylla ka la dep ban pynkhreh ban ia leh pyrshah,ia kito kiba ia leh pyrshah ia ka jylla, ia la ki jong ki briew  bad ia la ka jong ka Ri. U myntri rangbah u la kren shai kdar ba ka seng Indian National Congress, kumjuh leh bad kan nym leh ba kan don kano kano ka jingiadei ne ia jan bad ki seng kieng atiar. Ka thong jong ka seng ka long beit ban wanrah ia ka jingsuk bad ia kane la kren shai ha ka jingkular election.

U Dr Mukul u la ong ba kum u myntri rangbah bad kum ka seng Indian National Congress, ka burom ia ka rai bas tad jong u paidbah bad ka thong jong ka seng hi ka long ban ai ka jingshakri ia ki paidbah kum ka kynhun ne kum ki riewshimet.

U myntri rangbah u la ong ba u la shim khia ba ia kane ka jingkynnoh ia kaba la mih ha ki lad pathai khubor, ka sorkar kala dep ban bethah ia ki bor jong ka ain ban tohkit bad ban pynshitom katkum ka ain. La ong ba lada lap ba don ki seng sain pyrthei, ne na ka seng INC, kiba don ka jingiasylla bad kano kano ka kynhun lehnoh la ka dei ka HNLC lane bad ka GNLA lane bad kiwei kiwei ki seng lehnoh, ai kan long kaba shai kdar ba kim don ia ka bor bad lada don kiba leh kin hap ban shim hi ia ka jingkit khlieh  bad ki ain jong ka jylla kin trei kam.

U myntri rangbah u la ong ba lada kynmaw ba ka jingialeh politic bad ki kam sniew kala ktah haduh katta katta ha ka liang jong ka roi ka par bad kane ka dei ka daw jong ka jingsah dien ka jylla baroh kawei, ka sorkar sa shisien ka pynkynmaw biang ba kan leh da kaba tyngeh katkum ki ain pyrshah ia kino kino kiba pyrshang ban wanrah ia ka jingsniew da kaba wanrah ia ka jingduhnong na ka bynta ki paidbah bad ia ka jylla baroh kawei ong ka kyrwoh na u myntri rangbah ka jylla kaba la phah mynta ka sngi.