Shillong, Rymphang 03: U Chief Secretary jong ka jylla u KS Kropha u kyrpad ia ki paidbah ba kin ia poi sha ka DigiDhan Mela kaban long ha ka 7 tarik ban pynsngewthuh paidbah ha kaba ia dei bad ka jingpyndon kam ia ki kor ki bor ha kaba ia dei bad ka ia siew ia tad ha iew ha hat.
Haba kren ha ki nongthoh khubor mynta ka sngi ha karma trei kam jong u la ong ba wat la ka jylla ka dang hap ban iaid shibun ki jingeh hynrei ka hap ban iaid sha khmat ha kaba pyntrei kam ia kane ka jingiasiew ia tda lyngba ki kor ki bor katkum kane ka juk kaba mynta.
Ka dei jingeh ia ki paibah namar ba bun na ki jaka ha kane ka jylla kim pat don ia ka Internet bad kane ka jingeh ka long kaba ha khmat eh ia ka sorkar, hynrei kane ka jingpyndon kam ia kine ki juk kiba mynta ka long ba hap ban ia beh ruh ia ka por.
Ha katei ka sngi baroh ki bank, ki company kin ia poi ban pyni sha ki paidbah ia ka rukom siew rukom tda da ki kor ki bor ha ki shnong kiba duna ki bank, na ka liang jong ki bank kin sa buh ia ki nongtrei ba kin nong kum ki bnak ha kaba ia dei bad ka rukom ia sei ia thep pisa.
Ha ka juh ka por ka sorkar pdeng ka kwah ba ia kane ka rukom ia siew ia tda dei ban pynshlur ia ki paidbah laka long ha ki sor ne nongkyndong. La ong ba kane ka jinghikai kan nym kut tang ha Shillong hynrei kan beteng wat sha ki nongkyndong.
U Chief Secretary ula ong ba ia kane ka Mela kaban sdang naduh ka por 10 baje mynstep kan kut haduh ka por 6 baje janmiet ia kaba yn sa plie da u myntri jong ka sorkar pdeng u Ranjan Gohain, la ong ba ka sorkar pdeng kala jied shispah tylli ki nongbah ha ka Ri India ban pynlong ia kane ka Mela bad ka shnong ka dei kawei na kita.
U Bah Donal Wahlang Commissioner secretary jong ka IT Department jong ka sorkar Meghalaya u la ong ba ka sorkar mynta kan sa wanrah ia ka police ha kaba ia dei bad kane ka kam ia kaba yn tip kum ka Digital Policy bad kane kan long kyrpang iaki Mobile Tower ban peit ba baroh ki bynta jong ka jylla Meghalaya ki dei ban ioh ia ka net work.
