Shillong, Naitung 14: Ka myntri ba dei peit ia ka tand Social Welfare ka Debora CH Marak kala ong ba ka sorkar kala pyntreikam ia ka jingmang kam kyrpang kaba 3 percent ia ki briew kiba anna katkum ka policy bhah kam jong ka jylla.
Haba kren ha ki nongthoh khubor ha dien ba kala ia kynduh ia ki dkhot jong ka Khasi Disabilities Association (KDA) kiba la leit ban ia kynduh ia ka ha kamra trei kam jong ka.
Haba ia dei bad kiwei ki jingdawa jong ki kum ia ka skhim IAY, AAY kala ong ba ka sorkar ka bud ia ki kyndon kiba la buh da ka sorkar pdeng bad lada ki dei hok ban ioh ki dei ban ioh kala ong.
Ha kaba ia dei bad ka jingai baibam na ka bynta kiba anna ka sorkar kala pynkiew na ka 200 tyngka sha ka 500 tyngka ha ka shi bnai bad halor ka jingdawa ban ai 5000 tyngka ia kane ka hap ban ia kren bad ka sorkar.
Ha kane ka sngi ka KDA kala ai ia ki 12 tylli ki mad jingdawa jong ka seng kaba ka sorkar ka dei ban pyntrei kam na ka bynta kiba anna. Kum ka jingbuh kyrpang ia ki jaka shong na ka bynta jong ki ha ki bus JNURM.
Haba ia dei bad ka jingmang kyrpang ia ki seat ha ki jaka pule. Haba ia dei bad kane ka myntri kala ong ba ia kane ym nym lah ban buh kyrpang namar ka sorkar ka ailad ia baroh ba ki dei ban ioh ban pule lada don kano kano ka jaka pule kaba kyntait ki dei ban iathuh bad yn pynshitom ia kito ki skul la ong ka myntri.(SP News)
