Shillong Kyllalyngkot 21: Ka jylla Meghalaya, ia kaba la tip kum ka jaka pdeng jong u lyoh mynta ka sngi kala rakhe ia ka jingdap 45 snem jong ka jingioh jylla ba pura bad la rakhe ha baroh ki dong bad ki thain jong ka jylla hi baroh kawei.
Ha kane ka nongbah Shillong la pynlong ha Soso Tham Auditorium ha kaba u Deputy Chief Minister jong ka jylla u DR RC Laloo u la ong u kongsan ha ka jingiadon lang ki myntri sorkar, ka Kong Ampareen Lyngdoh, Kong Roshan Warjri, , u Bah A L Hek MLA, u Chief Secretary u K S Kropha bad shibun kiheh sorkar.
Ha ka jingkren jong u Dr RC Laloo u la ong ba kane ka jingrakhe ia ka sngi ba la ioh ia la ka jong ka jylla ba pura, ka long ban pynkynmaw ba kumno ia ka jingaleh ia la Hills ka long kaba jai jia khlem da don kano kano ka jingiaum snam, ka dei ka jingiohi jngai jong ki nongalam ha kito kip or ba da ka ioh ia la ka jong ka jylla ka long ban pynneh pynsah ia ki jong ki riti dustur bad ia la ka jong ka jingling tynrai bad ha ka juh ka por ban kyntiew ha ka ioh ka kot ha baroh ki liang ryngkat ka shong suk shong sain.
U Myntri rangbah synbut, u la kyntu ia ki paidbah ba to kin ia shim ia ka rai ban buh ia ka thong ban pynlong ia ka jylla kaba kiew ha ka ioh ka kot bad ha ki liang baroh bad ia kane lah ban leh da ka jingiatreilang bad kane ka dei ka thymmei jong ka jingialeh hills state kaba la bsuh ha u wei pa u wei ban ioh ia la ka jong ka jylla ban kiew ha ki liang baroh.
Ha ka jingkren ka kong AmpareenLyngdoh myntri ka sorkar jylla kala ba, yn nym lah ban klet ia ki riew rangbah kiba la ioh jngai ban ialeh ban pynioh ia la ka jong ka jylla bad kane ka jingialeh ka jong ki ka long ka jingialeh kaba jai jai, na ka liang jong ka myntri ka khot kawer ia ki paidbah nongshong shnong ban ia treilang na ka bynta ka roi ka par jong ka jylla bad kham tam eh ka jingpynkhreh ban rakhe ia ka jingdap 50 snem jong ka jylla ha u snem 2022.
Ha kane ka sngi la pynbna ruh ia ka khusnam ia ki lai ngut ki briew kiba la wanrah nam rah burom ia ka jylla ha ki ba bun ki liang, ia ka khusnam yn sa sam ha ka sngi rakhe Republic Day haka 26 tarik mynta u bnai, bad kita ki long u Bah Sumar Sing Sawian yn ioh ia ka Tirot Sing Syiem Award ha kaba ia dei bad ka thoh ka tar, u Leander K Marah, un ioh ia ka khusnam Pa Togan Sangma ha kaba ia dei bad ki kam trei mon sngewbha, Ka kong Dolyne Kharbhih kan ioh ia ka khusnam Kiang Nangbah ha kaba ia dei bad ki kam ialehkai.
Ha kane ka sngi la sam ruh ia ki khusnam Meghalaya Day Excellence Awards sha ki nongtrei sorkar kiba la trei shitom ia ka kam kaba la pynkham ti ha ki bad kine kiba la ioh ia kane ka khusnam ki long, Shri Tomlin S Sangma jong ka Land Records & Survey Department, Shri. George S Sawian jong ka Fisheries Department, Shri Thesus K Marak jong ka Sports & Youth Affairs, Smti. Kordorlin Khongriah jong ka Power Department, Smti. Ioana Jala Kharbhih jong ka Forests & Environment Department, Shri. Pagarson R Marak jong ka Gasuapara C & RD Block, Smti. Ritina Blah na DC’s office East Khasi Hills District, Smti. Janailin Lyngdoh jong ka DC’s office, Ri Bhoi District, Shri. Bloomingson Sanglyne jong ka Directorate of Information and Public Relations, Smti. Persarabasuk Marbaniang jong ka Revenue & Disaster Management Department, Shri. Barnette Diengdoh jong ka Secretariat Admn. (N) Department, Shri. Hari Nayak jong ka Tourist Information Centre, Kolkata, Government of Meghalaya, Shri. Armstrong D Marak jong ka Cabinet Affairs Department, Smti. Ailinda Mawlong jong ka Secretariat Admn (E) Department bad ka Smti. Drostina Lyngdoh Nonglait jong ka Personnel & AR (B) Department.
Kiwei kiba la kren ha kane ka jingialang ki long u Chief Secretary, Shri K. S. Kropha, kong Theilin Phanbuh, Chairperson, MSCW u Additional Chief Secretary, Shri P W Ingty. Ia ka khubor na u myntri rangbah ka jylla la pule da ka Director, I&PR, Smti M N Nampui ha kane ka jingrakhe ia kane ka sngi ba kyrpang.
Ha kane ka sngi la ai ruh ia ka khusnam “Kayakalp Awards” sha ki ar tylli ki District Hospital bad saw tylli ki CHC ha kaba kila trei bha ban pyndep ia ka kamram jong ki ha kaba ai jingsumar ia ki paidbah, ka khunsam ka leit sha ka Civil Hospital, Tura bad Civil Hospital, Williamnagar, ki CHC ki long ka Chokpot CHC, Bhoirymbong CHC, Laskein CHC bad Khliehriat CHC. Ban pynsuk ruh ia ki paidbah na ka bynta ki kam kiba bun mynta ka sngi la pynlait paidbah da u kongsan ia ki san tylli ki Mobile App na ka bynta ki san District.
