Shillong, Lber 28: U Chief Executive Member jong ka KHADC u Bah Teinwell Dkhar haba jubab ia ka mat jingiakren kaba la wanrah da u MDC ka Nongpoh u Bah Balajied Ranee halor ka jingai jingbit ban jurip ia ki marpoh khyndew sha ka Geological Survey jong ka Ri India da u CEM barim jong ka KHADC u Bah HS Shylla, lada ka NOC ka don jingiadei bad u Uranium ka EC kan pynduh noh ia ka.
Na ka liang jong u CEM jong ka KHADC u la kren shai ba ka EC kan sa khot markhat ia ki heh jong ka GSI ban ia kren ban ia shai halor kane ka NOC kaba la dep ban ai sha ki ban jurip ia ka jingdon ki marpoh khyndew ha ki bynta kiba hap hapoh u pud u sam jong ka KHADC.
Ha ka juh ka por uCEM u la ong ban wad bniah ia ki marpoh khyndew ka juh jia ia kaba la leh da ka GSI namar kwah ban tip ia ka jingdon ki marpoh khyndew ha kane ka jylla. Na ka liang jong u CEM u la kren shai ba lada don ka jingiadei ha kaba ai jingbit bad ka kam Uranium ka EC kan pynduh noh ia ka jingbit kaba la ai.
Na ka liang jong u EM ba dei peit ia ka khyndew u Bah M Wankhar haba jubab ia kane ka juh ka mat ia kren u la ong ba ka jingbit kaba la ai kam shai u la ong ruh ba ka GSI kala dep kren ba kam don jingiadei ei ei bad ka kam Uranium, halor kane ka EC kan sa bishar bniah bad lada don jingiadei bad u Uranium kin pynduh.
Ha ka jingkren jong u Bah Balajied Ranee haba wanrah ia kane ka mat ia kren u la ong ba ka jingai NOC u CEM barim ka don jingiadei bad u Uranium, U Bah Banjop Pyngrope MDC haba ia shim bynta ha kane ka jingiakren u la ong ba lada ia u dewiong la khang balei kwah tih Uranium habala tip ba don ka jingmynsaw ia ka koit ka khiah.
Ha ka jingkren jong u Bah Gabriel Wahlang MDC jong ka Nongstoin u la ong ba kane ka NOC kam shym la thoh shai bad u la kwah ban ioh ia ka jingpynshai.U Bah Ronni V Lyngdoh MDC ka Mylliem u la ong ba kumno lah ban ai NOC haba la pynbna ilekshon ka jinglong CEM u Bah HS Shylla ka long tang ban shipeit shipor . La ong ba ka NOC kam kren shai.
U Bah Karnes Sohshang MDC jong ka Mawkyrwat, u la ong ba lada dei bad u Uranium dei ban pynduh noh namar la iathuh kaei ka ban jia, la dawa ba la dei ba don jingiadei bad u Uranium dei ban pynduh pyndam ia ka NOC. U nongialam ka liang pyrshah u Bah Lamphrang Blah u la ong ba la dei bad u Uranium dei ban pynduh, namar u CEM barim hi u Bah HS Shylla u la leit ban nym shah tih Uranium tih Uranium.
