Shillong, Rymphang 10: U bah Prestone Tynsong myntri ba deipeit ia ka tnad PHE, u ba dei ruh u MLA jong ka pynursla u la ong ba ia ka Pynursla Civil Sub Division yn plie ha ka 15 tarik mynta u bnai da u myntri rangbah ka jylla u Dr Mukul Sangma.
La ong ba kane ka Civil Sub Division kan kynthup ia ka Elaka Laitlyngkot, Raid Nongkynrieh naduh Nongjri bad shaduh jingkieng Dawki laitnoh kawei ka GS Circle kaba kynthup ia ki phra tylli ki shnong, ka jingbym lah ban pynrung ia kine ka long namar ba ka sorkar kala ioh ia ka dorkhas na ki rangbah shnong.
Haba ia dei bad kane u Bah Prestone u la ong ba ka jingkhang ka dang plie lada ki paidbah ki kwah ki lah ban wan ia kynduh ia ka sorkar ha dien ka 15 tarik mynta u bnai. Ha ka 15 tarik yn thung ruh ia u SDO ba nyngkong bad ia ka jingpynbna sorkar yn sa aiti ha kane ka sngi.
U Bah Prestone u la ong ba kane ka Civil Sub Divison kan trei kam noh naduh ka sngi ba plie ia ka ha ka ophis ba shipor katba ym pat lah ban ioh ia ka jaka trei kam kaba pura. Da kane ka jingplie ia kane ka Civil Sub Division mynta kala pynurlong ia ka jingdawa jong ki paidbah ka Ri War Mih ngi kaba la neh mynta la laiphew snem.
