Shillong, Kyllalyngkot 19: Ki bor pyniaid jongki District bapher bapher ha ka jylla mar ia pynbna ka Election Commission ka Ri India iaka elekshon sha ka iing dorbar thawain ka jylla ha ka 18/01/2023, ki bor pyniaid ia ki District ha ka jylla kila sdang ban weng ia ki poster jong ki seng sain pythei kiba wah kylleng kylleng.
Ki Deputy Commissioner jong ki District bapher kila sdang ban phah weng iaki poster kiba la kiba don ha ki surok,kiba la pynieng ha ki dukan jong ki briew bad ia kiba la thah ha ki kynroh jong shnong bad ki dong bapher bapher.
Kumba ka paw ki poster kiba la wah ha kylleng jong ka jylla kiba bun dei jong ka party BJP, ka TMC bad jong ka NPP, kine ki lai tylli ki party kiba la ialeh ban pynpaw sha ki paidbah da ki poster ha ki dong bad ki shnong.
U CEO jong ka jylla Meghalaya u la dep ban batai ba ia ki poster lada dei ha ki ophis sorkar dei ban weng hapoh 24 kynta, lada dei ha ki jaka paidbah dei ban weng hapoh 48 kynta bad na ki jaka jong ki riew shimet dei ban weng hapoh ka 72 kynta.
