Shillong, Lber 26: Mynta ka sngi baroh kiba la thep kyrteng ban ia khun ia ka MP elekshon sha iing dorbar thawain jong ka Ri India Lok Sabha, ki don 4 ngut kiba la thep kyrteng na ka 1-Shillong Parliamentary Konstitwensi bad 2 na ka bynta ka 2-Tura Parliamentary Konstitwensi.
Kiba la thep kyrteng ha ha Shillong ki long u Dr. Ricky A.J Syngkong na ka VPP, ha kaba la synran lang da ki lai ngut ki MLA, u bah Adelbert Nongrum, bah Heaving Stone Kharpran, bah Brightstarwell Marbaniang, katba u bah Ardent Miller Basaiawmoit President ka party khlem wan lang ha kane ka jingthep kyrteng.
U Bah Vincent H Pala na ka seng INC la wan thep kyrteng mynta ka sngi ha kaba la synran lang da ki MLA jong ka party bad ki nongkyrshan kane ka dei ka sien kaba saw kaba un ia khun ia ka MP Elekshon ha kaba u la dep ban jop lai sien lynter na ka seng Congress.
U Bah Lakhon Kma u la thep kyrteng kum u kyrtong shimet ha kane ka sngi la synrang lang ia u da ki nongkyrshan jong u ha kaba kila don lang ha ka jingthep kyrteng namar kum ki kyrtong shimet ki hap ban don 10 ngut ki nongtyrwa ban long u kyrtong.
Ha kane ka sngi u Kyrtong ka UDP ia kaba la kyrshan lang ruh da ka party HSPDP u bah Robert June Kharjahrin na ka party UDP u la thep ia ka kyrteng jong u mynta ka sngi ha kaba la synran lang da ki 12 ngut ki MLA jong ka UDP, na ka liang jong ka HSPDP la don lang da u President bah KP Pangniang bad ki nongkit kam ka party.
Ha Tura ka Agatha Sangma kala thep kyrteng mynta ka sngi na ka NPP, ha kaba la synran lang da u President jong ka party u Conrad K Sangma ba dei ruh u myntri rangbah ka jylla, ki kynhun myntri bad ki nognialam jong ka party.
U Saleng A Sangma jong ka INC u la thep kyrteng mynta ka sngi ha Tura ha kaba la kyrshan lang da ki nongtrei jong ka party. Ka jingthep kyrteng kan kut la shai ka sngi lada dang don kiba kwah ban thep kyrteng ban ia khun ia ka MP elekshon.
