Shillong, Rymphang 14: Mynta ka sngi u myntri rangbah ka jylla u Conrad K Sangma u la plie ia ka Hospital kaba 100 jingthiah ha Khliehriat ha East Jaitnia Hills District ha k jingdon lang u MLA kane ka jaka u bah Kyrmen Shylla ba dei ruh u myntri.
Haba kren ha kane ka jingialang paidbah u mytnri rangbah ka jylla u la pynpaw ia ka jingsngew kmen ban ioh ban plie ia kane ka jaka ai jingsumar ban iarap ia ki paibah katei ka thain bad ha ka jylla hi baroh kawei.
Ban pynbiang ia ki lat ai jingsumar ha ka Ri bad ki jylla ka long ka kam kaba eh bha, hynrei ka sorkar kala shim ia kane ka bynta kum ka phang kaba kongsan tam ban pynbiang ia ki jaka ai jingsumar bad kum juh ia ki briew ki ban trei ha ki jaka ai jingsumar.
Ban leh ia kane ka sorkar kala shim bad wanrah ia ki jaid skhim kiba bun jait kiba la pyntrei kam ha ki CHC bad PHC namar ia ki jingsumar dei ban ioh hapdeng 60-70% bad kum juh ha ki Dispensary bad ka sorkar kan pynpoi ia ki lat jingsumar haduh ki shong ki thaw.
U Myntri rangbah la ong ba kaba kongsan eh ka long ban shim ia ki lat jingiada, kum ka jinglehkhuid, ban bam ia ki jingbam ba tei met, ban long kiba phikir ia lade bad ban phah peit na ka por sha ka por ha kaba ia dei bad ka koit ka khiah. La ong ba ki khyllung, ki  khynnah, ki long kmie ba armet ki don kam ka jingsumar kaba kyrpang.
U Myntri Rangbah ha kane ka sngi u la pynpaw ia ka jingsngew nguh kaba kyrpang ia kiba trei ha ka tnad ka koit ka khiah bad baroh kiba don bynta ha ka jingiakhun pyrshah ia ka khlam COVID-19 ha kine ki ar snem ha ka jingiakhun pyrshah ia kane ka khlam ha kane ka jylla.
Ia kane ka hospital ba 100 jingthiah la dep ban shna naduh u snem 2013 bad ia ki kam ban trei la mang ha u snem 2014 bad kala trei kam naduh katei ka por bad ia ka CHC kaba don ha katei ka jaka la pyndon kam ka jaka sumar ia kiba shitom COVID-19 ha kane ka sngi la don ruh kiwei kiwei ki heh sorkar na ka tnad ka koit ka khiah.
