Shillong, Rymphang 02: Mynta ka sngi u bah David A Nongrum 42 snem MLA jong ka Mawryngkneng u la kem pang kynsan bad la leit rah ia u sha North Eastern Indira Gandhi Regional Institute of Health & Medical Sciences (NEIGRIHMS) bad haba la poi ha katei ka jaka sumar la ong ba u la khlad.
U bah David A Nongrum u la long ar sien kum u MLA jong ka Mawryngkneng, u la jop nyngkong kum u MLA na ka tei ka konstitwensi ha u snem 2013 kum u kyrtong shimet bad ha u snem 2018 u la pyniasoh bad ka party Congress bad u la jop ia ka MLA Election na ka tiket Congress.
Lah ban kdew hangne ba u bah David u dei u khun jong u bah Charles Pyngrope MLA ba mynta jong ka Nongthymmai na ka juh ka party congress u ba la long teng ruh u lamphang ka iing dorbar jong ka jylla Meghalaya.
U Myntri Rangbah ka jylla u Conrad K Sangma lyngba ka twitter u la pynpaw ia ka jingsngew kyndit halor ka jingkhlad noh ba kyndit jong u MLA ka Mawryngkeng u bah David A Nongrum, na ka liang jong u myntri rangbah u la ong ba kum u MLA ba dang khynnah u la long u ba trei shitom, na ka liang jong u phah ia ka jingsngewlem sha kiba ha iing ka sem bad duwai ba ai ka mynsiem jong u kan ioh ia ka jingjahthiat bymjuhkut.
U James Sangma myntri ba dei peit ia ka tnad khlaw, u la ong ba kala pynkyndit ia u ban tip ia kane ka jingkhlad ba kyndit jong u bah David A Nongrum MLA jong ka Mawryngkneng, kane ka jingkhlad jong u kam dei ka jingduh tang ia ka konstitwensi kaba u mih khmat hynrei ia ka jylla ruh baroh kawei, na ka liang jong u ruh u phah ia kane ka khubor sngewlem sha kiba ha iing ha sem bad ai u nongbuh nongthaw u pynteng ia ka iing ka sem.
