Shillong, Nailar 28: Na Meghalaya lai ngut ki thei bha briew sha ka ri Philippines kaba long ha u Risaw bad Naiwieng mynta u snem. Kine ki lai ngut kin mih khmat ia ka Ri India ha kane ka jingiakop ha kaba 40 tylli ki ri jong ka pyrthei kin wan ban ia shim bynta, la ong ka National Director Miss bad Mrs National Tourism ka Nurpur Saigal kaba la jop ia ka Mrs India 2015.
Haba kren ha ki nongthoh khubor ka Mrs Saigal kala ong ba ia kane ka jingiakop thei bha briew ban jied ba kin ioh ban leit mih khmat ia ka Ri India sha ka ri Philippines la pynlong ha Guwahati ha kaba phra tylli ki jylla na ka Ri India kila wan ban ia shim bynta ha kane ka jingiakop.
Ha kane ka jingiakop thei bha briew ki don ar bynta kawei ka Miss India Internal Global, kawei ka Miss India International Asia Tourism bad ka Mrs India Tourism International. Ha kane ka jingiakop na kane ka jylla Meghalaya lai ngut ki thei bha briew kila shah jied ban leit ia shim bynta ha kane ka jingiakop thei bha briew sha Philippines.
Ki lai ngut ki thei bha briew kiba la shah jied na kane ka jylla Meghalaya ki long ha ka Miss Indian International Global, ka samla Panchaly Ghosh kiba la wan ba ar ha ka jingiakop. Ha ka Miss Indian International Asian Tourism, ka samla Ebapynhun Syiemlieh kala long ka nongjop bad ha ka jingiakop Mrs Tourism International ka kong Mebarisha Sohphoh kala wan baa r ha kane ka jingiakop.
Ha kane ka jingiakop kaban long ha Philippines ka long halor ka phang pdeng “ Ban pynkup bor ia ki kynthei”. Ha kane ka jingiakop baroh ki ri jong ka pyrthei kaba kin wan ban ia shim bynta ki long 40 tylli. Kane ka long ka burom ia ka jylla Meghalaya ba ki briew jong ka jylla kin leit ban mih khmat ia ka Ri India ha kane ka jingiakop.
Na ka liang jong ka Mrs India 2015, ka ong ba kum ka kynhun ka don kam ia ka jingiarap jong ki paidbah ha kaba ia dei bad kane ka jingleit jong kine ki lai ngut ki thei samla ban ia shim bynta ha kane jingiakop ha katei ka ri.
