Shillong, Lber 09: U Myntri Rangbah ka jylla u Conrad K Sangma ba dei peit ruh ia ka tnad pla tyngka jong ka sorkar la wan rah ia ka mang tyngka na ka bynta u snem 2022-2023 ha ka jingduna pisa kaba T.1,849 klur.
U Myntri rangbah la ong ba ka jylla mynta u snem la antad ba ka jingmih kan long T.18,881/- klur bad ka jinglut kan long, ka jingpynlut kan long T.17, 917/- klur, ka jingsiew tang ia ka sut ha kane ka snem mang tyngka 2022-2023 kan long T.1,110 klur bad ka jingsiew ia ka bai bam tynmen kan long T.1,469 klur.
U Myntri Rangbah la ong ba kane ka mang tyngka mynta kam don shuh ia kata ka jingbuh bhah kyrpang ia ka jingmangh tyngka kaba dei ka Plan lane katta ka Non Plan hynrei la shim lang kumba leh ka sorkar pdeng ia ka rukom wanrah ia ka mang tyngka, ha ka juh ka por la mang pisa kyrpang ruh ia baroh ki tnad trei kam jong ka sorkar.
Ka jingpynlut ia kane ka pisa T.18,881/- klur tyngka na ka bynta kane ka snem mang tyngka 2022-2023, na ka bynta ka tulop bad ka pension kan long 38.46%, ha ka jingiarap pisa kan leit 19.27%, Ban pyntrei kam ha ki kam pynroi kan long 17.06%, ka ban siew ia ka ram ka shah 11.40%, ka jingpynlut ha ki ophis ka long 5.81% bad ha kiwei ki jinglut ka long 8%.
Na ka liang jong ka sorkar ka kwah ban pynlong ia ka jylla Meghalaya kum ka nongbah ka put ka tem jong ka Ri India, ka sorkar kan pynlong ia ki tamasa bad na ka bynta kane ka sorkar kala mang pisa T.20 klur tyngka, ka sorkar kan wan rah ruh ia ka polisi ha kaba ia dei bad ki kam shna phlim bad la mang T.5 Klur.
Ban pynduna ia ka jingkhap ngiah kali ha kane ka nongbah Shillong ka sorkar kan thied 100 tylli ki kali ban pyndon kam da la light ban kit ia ki khynnah skul bad na ka bynta kane ka sorkar kala mang pisa T.20 klur.
Ha kane jingwan rah ia ka mang tyngka u myntri rangbah u la kdew shai ia ka jingmang pisa na ka bynta ki tnad sorkar bapher bapher ha kaba u myntri rangbah u la kdew ha ka jingkren mang tyngka ka jong u.
