Shillong, Lber 19: U Bah Nehlang Lyngdoh MLA barim jong ka Rymbai Konstitwensi mynshuwa u ba la jop ar sien na ka seng Congress mynta haba wan phai biang sha ka sain pyrthei ka daw kaba la ai ka long ba ka Konstitwensi Rymbai ha kato ka por bad mynta la tip kum ka Khliehriat Konstitwensi.
U bah Nehlang la ong ba ka daw kaba kongsan ka long ba ka jingwan phaibiang ka jong u sha ka sain pyrthei ka dei namar ba ka konstitwensi kaba u la shakri shiphew snem myshuwa ha ka jaka ba kan dang kiew ha kine ki saw snem kala hiar pynbna bad ki paidbah kila kyrpad ban wan phai biang ban sain dur thymmai ia ka konstitwensi bad ia ka District baroh kawei.
U Bah Nehlang u la ong ba u khlem rem hynrei dei ba u sangeh hi, hynrei namar ka jinghiar ka konstitwensi ha kiba bun ki liang ki paidbah kila kyrpad biang ia u ba wan biang sha ka sain pyrthei dei halor kane ka jingkyrpad u la pyrkhat la bun bun bnia bad ha dien la shim ia ka rai ban sngap ia ka sur jong u paidbah.
Haba ia dei bad ka jingleit ban pyniasoh bad ka Party NPP, u bah Nehlang Lyngdoh la ong ba ka daw ka long ba u iohi ba dei kane ka sorkar hapoh ka jingialam jongu Cornad K Sangma kum u myntri rangbah u la sngap ia ka jingdawa jong ki paidbah ka jylla kaba kila dawa na ka por sha ka por.
Dei ha kane ka sorkar kaba la ialam da ka NPP la iohi ba ka sorkar kala shim ia ka rai ha iing dorbar ban dawa na ka sorkar pdeng ban pyntrei kam ia ka IP ha kane ka jylla Meghalaya, kum juh kala shim ia ka rai ha iing dorbar ban dawa na ka sorkar pdeng ban pynrung ia ka ktien khasi bad Garo ha ka Khyrngit kaba phra.
Kawei kaba kane ka sorkar kala iohi ia ka jingduna ki IAS ophisar ha ka jylla bad kane ka sorkar kala thoh sha ka sorkar pdeng ba dei ban phiah noh ia ka IAS Cadre na ka jylla ban ka jylla Meghalaya kan don noh la ka jong namar kubma ka long mynta don lang bad ka jylla Assam.
U bah Nehlang u la ai nuksa ba ka jylla Meghalaya ka don kam IAS 77 ngut hynrei kiba don ki long tang kumba 41 ngut bad ka jingduna ka long kumba 36 ngut kane ka kala ktah ia ka jingtreikam ha ka jylla, kane ka jingduna ki ophisar kala pynthut ia ka jingtrei kam jong ka sorkar namar kala khia palat ka kam ia ki IAS kumta la don kam ban don noh la ka jong ka kynhun.
Haba ia dei bad ka jingkhang ia ka jingthih dewiong, dei kane ka sorkar kaba la ai ia ka Affidavit sha Supreme Court, lyngkot ka iing bishar ha u snem 2019 kala ai ia ka jingbtah ba shah ia ka jingtih dewiong da kaba but ia ki kyndon da kaba pan laisen, kine ki kam kiba ka party NPP kala leh hapoh ka jingialam jong u myntri rangbah ka jylla u Conrad K Sangma kala pynlong ban pyniasoh bad ka party NPP, la ong u bah Nehlang.
