Shillong, Kullalyngkot 27: “ Ngam shym poi pyrkhat ba ngan ieng hangne ban shim ia kane ka salute, ha kum kane ka sngi Republic Day” ong u Lat ka jylla u Tathagata Roy ha ka jingkren jong u ha ka sngi Saitjian ban rakhe ia ka jingdap ka 70th Republic Day ha madan polo. U Lat ka jylla la ong ba dei ha u snem 1951 ha ka por ba u dang 6 snem ka rta u la wan ban peitkai ia kum kane ka sngi ha kane ka juh ka jaka ha kaba u Lat jong ka jylla Assam u Jairamdas Daulatram ha kato ka por u la shim ia ka salute ha kaba kum u khynnah um tip ei ei.
Ha ka jingkren jong u Lat ka jylla ha kane ka sngi rakhe ia ka 70th Republic Day jong ka Ri India u la ong ba dei ha kum kane ka sngi “Ngi kynmaw burom ia ki riew khraw jong ka Ri kiba la saindur ia ka Riti Synshar jong ka Ri bad ha kane ka sngi ngi kynmaw burom ia kito ki nongialeh laitluid jong ka Ri ha kaba kane ka jylla ruh kala ia don bynta lang ha kane ka jingialeh, u U Tirot Sing, U Kiang Nangbah bad Pa Togan N. Sangma lem bad kiwei kiwei ruh kiba ym lah ban tip.
Ha kane ka sngi u Lat jong ka jylla u la ong ba ka jingtrei shitom bad ka jingieit ia ka jingsuk da ki nongshong shnong ka long ka bor bah ia kano kano ka ri bad ki briew jong kane ka jylla ki bud ia kane ka nuksa. U la ong ba ka jingiakhih kan nym dei ka lynti ban weng ia ki jingeh, ia ki jingeh lah ban weng tang da ki jingiakren bad u kyntu ia ki paidbah ka jylla ba kin bat ia ka nongrim jong ka synshar paidbah khnang ban poi sha ka jingjop ha kaba ia dei bad ka roi ka par.
Haba phai sha ka shong suk shong sain jong ka jylla u Lat u la ong ba kala kham don ka jingshong suk, na ka liang jong ka sorkar jylla ruh kala shim ia baroh ki lad ki lynti kumno ban ai ki jingiada ia ki paidbah nongshong shnong khamtam eh ka jingleh pyrshah ia ki riew kynthei, la ong ba dei ban shim ia kane ka kabu ban ialeh ban kyntiew ia ka jylla ha ka roi ka par.
Ha kane ka sngi u Lat jong ka jylla u la kren ruh ia shibun ki kam kiba ka sorkar kala leh na ka bynta ban kyntiew ia ka jylla ha ka roi ka par ha baroh ki liang naduh ki surok haduh ka rep ka riang, ka pule puthi bad kiwei kiwei de kum ka umbam umdih bad ki kam pynroi ha ki nongkyndon.
Ha kane ka sngi u Lat jong ka jylla u la ai ruh ia ka khusnam sha ki lain gut ki riew khraw, ia ka Tirot Sing Award kaba dei ha ka liang ka thoh ka tar la ai sha u Dr Phervision Nongtdu, ia ka Khusnam U Kiang Nangbah kaba dei bad ka jingialehkai la ai sha u Eugene K. Marak. Ia kane ka sngi la pynphuh pynphing da ki jingiaid parade jong ki kynhun shipai, Pulit, ki NCC bad na ka liang jong ka Red Cross Society.
Ha dien ba la pynher ia la Lama lairong jong ka Ri u Lat jong ka jylla u la shim ia ka “Rashtriya Salute” ha ka jingiadon lang ki paidbah ban sakhi lang ia kane ka sngi burom ba 70th Republic Day. Ha kane ka sngi ki shipai suin kila pynhap ruh ia u syntiew ba 30 kilo na jrong ka helicopter jong ki ban burom ia kane ka sngi.
