Shillong, Rymphang 10: U Speaker ba rim jong ka iing dobar thawain ka jylla u Martin M Danggo u la ong ba naduh ka sngi kaba u mih na ka party NPP haduh mynta ym pat leit rung sha kano kano ka party.
Haba kren ha u SP News Agency u la ong ia ka jingleit rung sha kano kano ka party yn sa dang peit ha dien, hynrei u la pynthikna ba ha kane ka MDC ilekshon shiteng samoi napoh 26-Langrin Konstitwensi yn ai ka jingkyrshan ia u kyrtong MDC ka party Congress.
“ym dei tang ba ngan ai jingkyrshan hynrei ngan da leit ruh ban kanbas na ka bynta u kyrtong ka Congress u Bah Jotin Khardewsaw, ha kane ka kynti kaba mynta, nga kyntu ia baroh ki nongkiyrshan jong nga ba kin kyrshan ia u kyrtong ka Congress” la ong u Martin M Danggo.
U Speaker barim jong ka iing dorbar thawain ka jylla u Danngo u la ong ba ia mynta ym pat don kano kano ka jingthmu ban rung sha kano kano ka party bad ka jingmih khubor kaba ong ba la rung party kam dei kaba shisha.
