Jowai,Naitung 24: Ka Jaintia Students’ Union (JSU) bad ka Jaintia Youth Federation (JYF) ki ar tylli ki Sengbhalang kiba ia don lang ha ki thup jong ki 13 tylli ki Sengbhalang ban dawa pyntreikam iaka ILP hapoh ka jylla jong ngi, ki pynpaw iaka jinmgsngerwkhia kaba jur halor ka jingmih jong ki kynrum kynram ha pdeng ki Sengbhalang bad khamtam halor ka jingshah kynnoh ba lai phew jait haki paidbah trai Ri jong ka Jylla.
Ha ka jingpyllait khubor mynta ka sngi lyngba ki nongialam jong kine ki ar tylli ki Sengbhalang ki pynpaw ba ka JSU bad ka JYF kim pat klet lane ieh noh iaka mat dawa ILP haduh kine ki sngi bad ka khylliap mat, ki ar Seng kim don jingtip bad kim don bynta ha kata ka jingdawa kaba da kawei pat ka ILP kaba shu khot Modify/ Modern ILP, bad ngim tip hi ruh ba don bun tylli kita ki ILP hynrei kaba ngi tip ka don tang kawei ka ILP, kaba haduh mynta ngi dang ieng skhem haka nongrim ban dawa pyntreikam tang ia kawei ka ILP katkum ka Eastern Bengal & Frontier Regulation 1873.
Ha ka jingiakynduh kaba khatduh bad u Chief Minister Dr. Mukul Sangma halor kane ka mat (ILP) baroh ki 13 tylli ki sengbhalng ngi khlem ia kren ia katta ka Modify ILP lymne ai kano kano ka jingai jingmut daka ktien lane daka jingthoh ban thaw da kawei pat kata ka ILP, bad lada don kum kane ka JSU bad ka JYF ka kyntaid mardor namar ngi khlem ai kano kano ka jingmynjur lane ka jingsoi kti halor kata ka jingai jingmut. Haduh mynta ngi khlem ai / don bynta ha kino kino ki jingai jingmut iaka sorkar, hynrei beit beit tang ban pyntreikam iaka ILP kata ka long katkum ka Eastern Bengal & Frontier Regulation 1873.
Haoid kum ki nongialam, teng teng ngi sngew thamula ban iohi ba wat lada ngi khlem iakren lane mynjur ia kita kiwei pat ki ILP (Modern/ Modify ) hynrei kaei kaba jia ka long ba ngi juh iohi ba ka paw haki lad pathai khubor ba ngi ki 13 seng ngi dawa da ka ILP kaba don ki bniad ym shuh daka ILP katkum ka Eastern Bengal & Frontier Regulation 1873. Bad kane ka pynmih shibun ki kynrum kynrah hapdeng jong ngi ki
Sengbhalng.
Haka jingialang kaba khatduh jongngi ki Sengbhalang halor ka mat ILP ngi la shim iaka rai ba katba ka jingiaksaid jongngi naka bynta ka ILP 1873 ka dang iaid ngi dei ban ailad ruh ia u Chief Minister/ Sorkar ban thaw bad pynkhlain ruh ia kiwei pat ki lad ki lynti ban khang iaka jingwan rung kyrthep bad ka jinglongtrai jong u nongwei ha kane ka Bri jongngi, bad kane kam mut ba ngi la ieh noh iaka jingdawa iaka ILP, hynrei daka jingpyrkat jngai ba ioh katba ngi da iakhih bad ialeh naka bynta ka ILP kaba lah ban shipor khamslem u bar ri bad u bar jylla pat u nangtuid bad shim kabu. Hynrei ngi khlem rai ban ieh noh iaka ILP, shuh shuh ngi la ia kren ruh ba lada ngi jop ne ngi rem ai ba kan long kaba shai hakhmat u paidbah uba la ai ka jingkyrshan kaba pura halor kane ka mat.
Shuh shuh kaba sngewsih eh ka long halor ka jingkren jong u Dr. Mukul kiba paw ha ki lad pathai khubor “ ngim donkam ILP lane Modify ILP” kane hi ka pynpaw ba u Mukul Sangma (Chief Minister) imat um dei u nong shong shnong ka Jylla ne jaitbynriew Garo/achik, ba u kren pynhiar dor iaka jait bynriew jongngi haduh katta katta, namar ym dei tang ki Sengbhalang ba kwah ILP hynrei ki trai Ri trai Muluk ruh ki kwah jur ba u Chief Minister u dei ban phai khyndiat sha ka rai jong u Paidbah haka Rally hapoh Madan Student Jaiaw haka 30th Nov 2013. Hato lada ka long kumne ka hok bad ka rai jong u paidbah kala iap bad duh noh ha kane ka ri jongngi. Hato kane ka ri jongngi ka dei ka democracy state lane ka Dictator state.
Kaba khatduh eh ka JSU bad ka JYF ka ieng beit haka nongrim kaba skhem bad la i bor barit ban dawa iaka ILP kat kum ka Eastern Bengal & Frontier Regulation 1873. Bad lada ki para Sengbhalang ki iaid da kawei pat ka lynti ym banse ia ngi ban shim noh hi ia ka rai ban mih noh napoh ka thup jong ki 13 Seng pynkut u kyrwoh na kitei ki arseng.(SP News)
