Shillong, Naitung 24: Ban wanrah biang ia ka jingjyrngam hapoh jong ka District ka ophis jong u Deputy Commissioner East Khasi Hills kan pynlong ia ka jingthung dieng kaba heh ha baroh phra tylli ki block kiba don ha kane ka District hapoh ka skhim “CM’s Youth for Green Campaign” lyngba jong ka skhim Mission Green jong ka IBDLP.
Ia kane ka jingthung dieng yn ia treilang bad ka tand pynneh mariang bad ka tand khlaw jong ka sorkar. Ia kane ka jingthmu ban thung dieng haduh 7,00,700 tylli ki tynrai dieng yn pynlong ha ka 30 tarik mynta u bnai ha kaba yn sap lie hi da u mytnri rangbah ka jylla ha Jan law kyntang ha Mawphlang.
Ia kane ka sngi thung dieng la buh ban pynlong ha ka sngi ba ka pyrthei baroh kawei ka rakhe ia ka sngi jingiadei paralok bad na ka liang jong ka sorkar Meghalaya ka kwah ban sah kynmaw ha kane ka sngi ban pynlong paralok bad ka Mariang.(SP News)